“Давлат даромадига олинган мол-мулкларни соддалаштирилган аукцион тамойиллари асосида E-auksion shop электрон савдо дўкони орқали сотиш тартиби тўғрисида”ги ҳукумат қарори қабул қилинди.
Ҳужжатга мувофиқ қуйидагилар тасдиқланди:
- E-auksion электрон савдо платформасида рўйхатдан ўтиш, буюртма яратиш ва савдо ўтказилиши тўғрисида хабарномани жойлаштириш;
- E-auksion shop электрон савдо дўконида соддалаштирилган аукцион тамойиллари асосида савдоларни ташкил этиш ва ўтказиш;
- E-auksion shop электрон савдо дўконида такрорий савдоларни ўтказиш;
- Савдо ғолиби (салоҳиятли ғолиб) билан ҳисоб-китоб қилиш ва закалат пулини қайтариш.
Электрон савдо дўконида Мажбурий ижро бюроси ва унинг ҳудудий тузилмалари томонидан танлаб олинган савдо ташкилотлари ҳамда “Божхона сервис” давлат муассасаси ва унинг ҳудудий бўлимлари буюртмачи ҳисобланади.
Электрон савдо дўконида савдо тегишли эълон чиқарилган кундан кейинги иш куни соат 10:00 да бошланади ва 5 иш куни давомида, охирги иш куни соат 18:00 га қадар ўтказилади.
Қарор 2024 йил 6 январдан кучга киради.
Аввалроқ президент қарори билан мамлакатдаги 20 та вазирлик ва идораларда янги инвестиция лойиҳаларини ишлаб чиқиш ва амалга ошириш бўйича “лойиҳа офислари” ташкил этилганди. Шунингдек, Тошкент шаҳри ҳокимлиги муассислигида давлат ва тадбиркорлик субъектлари ўртасида “кўприк” вазифасини бажарувчи “Тошкент Инвест компанияси” акциядорлик жамияти ташкил этилаётгани тўғрисида хабар берилганди.
Изоҳ (0)