Ўзбекистон иқтисодиётининг 2023 йилда ўсиш суръати 5,8 фоизни ташкил этиши прогноз қилинмоқда, ривожланиш стратегияси муваффақиятли амалга оширилса, 2024 йилда иқтисодий ўсиш 6,5 фоизга яқинлашиши мумкин. Бу ҳақда «Газпромбанк»нинг бозор конюктурасини таҳлил қилиш бошқармаси бошлиғи ўринбосари Гулнора Хайдаршина маълум қилди.
“2026 йилгача бўлган ривожланиш стратегияси тасдиқланди. Унинг вазифалари саноат ишлаб чиқаришни 40 фоизга, экспорт ҳажмини эса 30 миллиард долларга етказишдан (2022 йилда экспорт 19,3 миллиард долларни ташкил этган) иборат”, — деди у.
Хайдаршина экспорт ўсишини биринчи навбатда юқори қўшимча қийматга эга маҳсулотлар ҳисобига таъминлаш режалаштирилганини айтди.
“Экспорт географиясини 115 тадан 150 тагача кенгайтириш режалаштирилган”, — таъкидлади у.
Хайдаршина юқори қўшимча қийматга эга маҳсулотлар улуши аллақачон 60 фоизга яқинлиги, бунда 23 фоизини ишлаб чиқариш, 20 фоизини хизматлар, 7 фоизини кимё маҳсулотлари, 6 фоизини бошқа тайёр маҳсулотлар, 5 фоизини эса машиналар, ускуналар ва бошқалар ташкил қилишини билдирди.
- Маълумот ўрнида, “Газпромбанк” 2022 йилда Ўзбекистон иқтисодиётининг ўсиши 5,7 фоизни, 2021 йилда эса 7,4 фоизни ташкил қилишини илгари сурганди.
ЕТТБ, ХВЖ ва Жаҳон банки прогнозлари
Аввалроқ Европа тикланиш ва тараққиёт банки Ўзбекистон иқтисодиёти 2023 ва 2024 йилларда 6,5 фоизга ўсишини прогноз қилганди. Банк ўзининг минтақавий ҳисоботида ташқи боғлиқликнинг нисбатан кучсизланишига қарамай, Ўзбекистон иқтисодиётига Россиянинг Украинага қарши урушининг янада кучайиши ва пул ўтказмаларининг қисқариши қийинчилик туғдириши мумкинлиги қайд этилган.
- Халқаро валюта жамғармаси апрель ойидаги ҳисоботида Ўзбекистоннинг иқтисодий ўсиш прогнозини яхшилаган.
- Унга кўра, 2023 йилда Ўзбекистонда ЯИМ ўсиши 5,3 фоизни ташкил этиши кутилмоқда, октябр ойидаги прогнозда бу кўрсаткич 4,7 фоизни ташкил этган эди.
- Жаҳон банки Ўзбекистон кейинги икки йилда Европа ва Марказий Осиё минтақасидаги энг яхши иқтисодий ўсишга эга бўлишини билдирган.
- Республика иқтисодиёти ўсиш суръати 2024 ва 2025 йиллар учун мос равишда 5,4 ва 5,8 фоизни ташкилл этиши кутилмоқда.
Изоҳ (0)