Украинанинг Defense Express нашри ҳисоб-китобларига кўра, сентябр ойида Россия қўшинлари Украинага қарши 503 та Shahed-136 ҳужумчи дронларини учирган. Бу рус кучлари томонидан кенг кўламли босқин бошланганидан бери фойдаланилган дронларнинг рекорд даражадагу сони. Аввалги рекорд май ойида қайд этилган — 413 та.
Украина ҳарбийларининг маълумотларига кўра, 503 та дрондан 396 таси уриб туширилган. Украина ҳаво мудофааси тизимининг дронларга қарши ўртача самарадорлик кўрсаткичи 78,7 фоизни ташкил қилади. Шу билан бирга, Defence Express ҳисоб-китобларига кўра, рус қўшинлари бир вақтнинг ўзида ҳужумда 20 дан ортиқ дрон учирмаган пайтда Украина ҳаво мудофааси самарадорлиги 100 фоизга яқинлашган.
Россия Эрондан сотиб оладиган Shahed-136 дронларининг биттаси нархи тахминан 20-40 минг долларни ташкил қилади. Ушбу ҳисоб-китобларга асосланиб, Россия сентябр ойида дрон ҳужумлари учун 10-20 миллион доллар сарфлаган дейиш мумкин, деб ёзади Defense Express. Шу билан бирга, иттифоқчилар томонидан Украинага етказиб бериладиган ҳаво ҳужумидан мудофаа ракеталарининг нархи ҳар донаси учун 1 миллион доллардан ошади.
“Москва буни анчадан буён ҳисобга олиб келади ва зарбаларни кўпайтирмоқда, кўп сонли Shahed-136 ларни ёппасига учириш ва зарбалар векторини доимий равишда ўзгартириш тактикасини қўлламоқда”, — дейилади ҳисоботда.
Изоҳ (0)