Россия қўшинлари 17 сентябрга ўтар кечаси Украина бўйлаб олтита Shahed-136/131 дрони ва ўнта Х-101/Х-555/Х-55 русумли ракеталар учирди. Бу ҳақда Украина Ҳарбий-ҳаво кучлари қўмондонлиги хабар берди.
Ҳужумнинг асосий йўналиши Одесса вилоятининг жануби экани айтилмоқда. Украина ҳарбийларига кўра, ҳаво ҳужумидан мудофаа кучлари олтита дрон ва олтита ракетани уриб туширишга муваффақ бўлган.
Ҳарбийларнинг аниқлик киритишича, Одесса вилоятидаги ҳужум оқибатида ҳеч ким жабрланмаган, бироқ қишлоқ хўжалиги корхонасига зарар етган. Маҳаллий “Думская” нашрининг ёзишича, гап вилоятнинг Березовский туманидаги дон омбори ҳақида кетмоқда.
Россия дон келишувдан чиққанидан сўнг, июль ойи ўрталаридан бошлаб Одесса вилоятига дрон ва ракета ҳужумларининг интенсивлигини оширди. Ҳужумлар давомида асосан донни сақлаш ва ташиш учун фойдаланиладиган инфратузилма нишонга олинмоқда.
Изоҳ (0)