“Реал” Макаллистер ва Фернандеш трансфери учун 100 млн евро сарфлайди

Мадриднинг “Реал” клуби ёзги трансфер ойнаси пайти “Ливерпуль” ярим ҳимоячиси Алексис Макаллистер ҳамда “Челси” футболчиси Энсо Фернадешни харид қилишни истамоқда. Fichajes нашри хабарига кўра, “қироллик клуби” аргентиналик икки футболчи учун 100 миллион евро сарфлашга тайёр.

Манбага кўра, мадридликлар янги мавсум олдидан ярим ҳимоя чизиғини кучайтиришни режалаштирмоқда. Фернандеш ва Макаллистер “Реал” мураббийи Хаби Алонсонинг талабларига тўлиқ мос келади: тактик, жисмоний барқарорлик, катта ўйинлардаги тажриба ва кучли характер. Бироқ бу трансферларни амалга ошириш осон бўлмайди. Фернандеш “Челси”, Макаллистер эса “Ливерпуль” сафидаги асосий футболчилар ҳисобланади. Шу сабаб “Реал” музокараларни эҳтиёткорлик билан олиб бормоқда.

Клуб президенти Флорентино Перес илгари кўплаб кутилмаган трансферларни амалга оширган. Мазкур ҳолат ушбу келишувларнинг амалга ошиш эҳтимолини кўпайтирмоқда. Айни пайтда музокаралар бўлмоқда. Агар барча томонлар келишувга эришса, ҳар икки футболчи янги мавсум “Реал Мадрид” сафида тўп суриши мумкин.

• Энсо Фернандеш ўтган мавсумда “Челси” сафида 53 ўйинда майдонга тушиб, 9 та гол ва 17 та голли узатмага муаллифлик қилган. Transfermarkt портали аргентиналик футболчининг қийматини 75 миллион еврога баҳолаган.
• Алексис Макаллистер эса “Ливерпуль” таркибида 49 учрашувда майдонга тушиб, 7 та гол ва 6 та ассист қайд этган. Унинг бозор қиймати 100 миллион евро деб белгиланган.