13 сентябрга ўтар кечаси Россия қўшинлари Одесса вилоятига учувчисиз учоқлардан зарба берди. Украина жанубидаги Мудофаа кучлари хабарига кўра, ҳужум тўрт ярим соат давом этган ва минтақадаги фуқаролик инфратузилмасини нишонга олган.
Ҳаво ҳужумидан мудофаа кучлари 32 та ҳужумчи дронни уриб туширди. Украина ҳарбий-ҳаво кучлари қўмондонлиги хабарига кўра, 13 сентябрга ўтар кечаси Россия қўшинлари Одесса ва Суми вилоятлари бўйлаб жами 44 та учувчисиз учар аппаратни учирди.
Дрон ҳужуми оқибатида порт инфратузилмаси объектлари зарар кўрган, юк машиналари тўхташ жойида ёнғин чиққан.
Украина жануби мудофаа кучлари маълумотларига кўра, етти киши – ҳайдовчилар турли даражадаги оғирликдаги жароҳатлар олган. Одесса вилояти раҳбари Олег Кипер, ўз навбатида, олти нафар тинч аҳоли яралангани ҳақида маълум қилди, улардан уч нафарини касалхонага ётқизишга тўғри келган.
Россия Украинадан дунёнинг бошқа мамлакатларига дон жўнатиш бўйича келишувдан чиққанидан сўнг, июль ойи ўрталаридан бошлаб Россия қўшинлари Одесса вилоятига дрон ва ракета ҳужумларининг интенсивлигини оширди. Ҳужумлар, биринчи навбатда, донни сақлаш ва ташиш учун фойдаланиладиган инфратузилмани нишонга олмоқда.
Изоҳ (0)