Туркия бундан буён Брюсселдан Европа Иттифоқига қўшилиш учун шарт ва талабларни қабул қилмайди, деди Ражаб Тоййиб Эрдўғон 1-октябр куни Туркия парламентидаги чиқиши чоғида.
“Биз Европа Иттифоқига берилган барча ваъдаларни бажардик, бироқ улар ўз ваъдаларининг деярли ҳеч бирини бажармади”, — дея Эрдўғоннинг сўзларини келтиради AFP.
Анқара “иттифоққа қўшилиш жараёнида ҳеч қандай янги талаб ёки шартларни қабул қилмайди”, деди Эрдўғон.
“Туркия бизни 40 йилдан бери дарвозаси олдида куттирган Европа Иттифоқидан энди ҳеч нарса кутмайди”, — дея қўшимча қилди у.
“Брюссел Туркияга талаб қўя олмайди”
Эрдўғоннинг сўзларига кўра, агар Европа Иттифоқи турк фуқароларига нисбатан “виза режими каби адолатсизликларни” тузатмаса, Брюссел энди Туркияга сиёсий, иқтисодий ва ҳарбий талаблар қўйишга ҳақли бўлмайди.
“Агар Европа Иттифоқи фақат қоғозда мавжуд бўлган кириш жараёнини якунлаш ниятида бўлса, бу унинг қарори”, — деди Эрдўғон.
Туркия 1999 йилда Европа Иттифоқига кириш учун ариза берган. 2005 йилда бошланган иттифоққа қўшилиш бўйича музокаралар 2016 йил охирида тўхтатилган. Reuters агентлигининг қайд этишича, узоқ вақт давомида Эрдўғон аъзо бўлиш бўйича музокараларни фаоллаштиришга қизиқиш билдирмаган, бироқ 2023 йилда у Туркия парламенти Швециянинг НАТОга аъзо бўлиш ҳақидаги аризасини маъқуллагунга қадар Брюссел Анқара учун Европа Иттифоқига қўшилиш йўлини очиши кераклигини айтди.
Изоҳ (0)