“Ипак йўли дурдонаси” XV Тошкент Халқаро кинофестивали доирасида “Такси” фильмида бош ролни (Даниэль) ижро этган таниқли актёр Сами Насери иштирокида 1-октябр куни “Ренессанcе” киночилар уйида ёш ва бўлажак киноижодкорлар учун маҳорат дарси бўлиб ўтди. Бу ҳақда Тошкент халқаро кинофестивали Telegram каналида хабар берилди.
Бу мастер класс ҳам Фредерик Диэфентал билан бўлган мастер класс каби енгил ҳазил-мутойибалар билан бошланди, дейилади хабарда.
Жумладан актёр “ Мен ҳам ҳамкасбим Фредерик Диэфентал каби рақсга тушиб беришим мумкин,”- деб, тадбир охирида айтган гапининг устидан ҳам чиқди, яъни “Такси” фильмидаги машҳур мусиқалардан бирига рақс тушиб берган.
Бундан ташқари Сами Насери сиёсатга қизиқмаслигини ва агар бериладиган таклиф ёқса, давлат танламасдан рол ижро этишини айтиб, қуйидаги фикрларни алоҳида таъкидлаб отди: “Мен учун сиёсатни қизиғи йўқ, мен шунчаки оддий инсонлар учун кинода суратга тушаман. Масалан ҳозир Франция ва Жазоир ўртасида ҳамкорликда суратга олинаётган мустамлакачилик ҳақидаги бир катта фильмда рол ўйнаяпман”.
Шунингдек у “Такси” фильмида рол ижро этган қолган актёрлар билан тадбирларда ва бошқа маросимларда учрашиб туришини, Эмилиен ролини ижро этган Фредерик Диэфентал билан эса доимо алоқада эканлиги айтиб берди. Бу иккилик ҳозир ўз продюсерлик фирмасини юритади ва бир-биридан қизиқарли фильмлар устида ишлашмоқда.
Ундан нега “Такси” фильмининг 5-қисмида ўйнамагани ҳақида савол сўралганда, у шундай жавоб берди: “Бу қисмнинг сценарийси менга ҳам дўстим Эмилиенга ҳам маъқул келмади, кейин у ерда умуман бошқа жамоа ишлади ва бизга умуман у муҳит ёқмади. Аммо эски жамоадошларимиз (режиссёр, актёрлар, продюсер, бастакор) иштирок этса ва фильм фалсафаси бизга ёқса, мен ҳам Фредерик ҳам 6-қисмда албатта рол ўйнаймиз”.
Изоҳ (0)