“Ipak yo‘li durdonasi” XV Toshkent Xalqaro kinofestivali doirasida “Taksi” filmida bosh rolni (Daniel) ijro etgan taniqli aktyor Sami Naseri ishtirokida 1-oktyabr kuni “Renessance” kinochilar uyida yosh va bo‘lajak kinoijodkorlar uchun mahorat darsi bo‘lib o‘tdi. Bu haqda Toshkent xalqaro kinofestivali Telegram kanalida xabar berildi.
Bu master klass ham Frederik Diefental bilan bo‘lgan master klass kabi yengil hazil-mutoyibalar bilan boshlandi, deyiladi xabarda.
Jumladan aktyor “ Men ham hamkasbim Frederik Diefental kabi raqsga tushib berishim mumkin,”- deb, tadbir oxirida aytgan gapining ustidan ham chiqdi, yaʼni “Taksi” filmidagi mashhur musiqalardan biriga raqs tushib bergan.
Bundan tashqari Sami Naseri siyosatga qiziqmasligini va agar beriladigan taklif yoqsa, davlat tanlamasdan rol ijro etishini aytib, quyidagi fikrlarni alohida taʼkidlab otdi: “Men uchun siyosatni qizig‘i yo‘q, men shunchaki oddiy insonlar uchun kinoda suratga tushaman. Masalan hozir Fransiya va Jazoir o‘rtasida hamkorlikda suratga olinayotgan mustamlakachilik haqidagi bir katta filmda rol o‘ynayapman”.
Shuningdek u “Taksi” filmida rol ijro etgan qolgan aktyorlar bilan tadbirlarda va boshqa marosimlarda uchrashib turishini, Emiliyen rolini ijro etgan Frederik Diefental bilan esa doimo aloqada ekanligi aytib berdi. Bu ikkilik hozir o‘z prodyuserlik firmasini yuritadi va bir-biridan qiziqarli filmlar ustida ishlashmoqda.
Undan nega “Taksi” filmining 5-qismida o‘ynamagani haqida savol so‘ralganda, u shunday javob berdi: “Bu qismning ssenariysi menga ham do‘stim Emiliyenga ham maʼqul kelmadi, keyin u yerda umuman boshqa jamoa ishladi va bizga umuman u muhit yoqmadi. Ammo eski jamoadoshlarimiz (rejissor, aktyorlar, prodyuser, bastakor) ishtirok etsa va film falsafasi bizga yoqsa, men ham Frederik ham 6-qismda albatta rol o‘ynaymiz”.
Izoh (0)