Ўзбекистонда саккиз ойда савдо соҳасида энг кўп солиқ тўлаган корхоналар маълум қилинди

Солиқ қўмитаси 2023 йилнинг саккиз ойида савдо соҳасида энг кўп солиқ тўлаган топ-20 та корхона номини маълум қилди.

Қайд этилишича январь—август ойларида 150 427 та юридик шахс томонидан 13,6 триллион сўм солиқ тўланган. Шундан 1,1 триллион сўми, яъни 8,3 фоизи 20 та корхона ҳисобига тўғри келади. Уларнинг жами товар айланмаси 24,1 триллион сўмни ташкил этган, қўллаган солиқ имтиёзлари миқдори эса 437,1 миллиард сўмга етган.

Ушбу 20 та солиқ тўловчи томонидан таъминланган тушумлар солиқ турлари кесимида:

• ҚҚС — 445,6 миллиард сўм;
• фойда солиғи — 310,4 миллиард сўм;
• ЖШОДС — 172,4 миллиард сўм;
• ижтимоий солиқ — 71,6 миллиард сўм;
• акциз солиғи — 68,5 миллиард сўм;
• мол-мулк солиғи — 15,9 миллиард сўм;
• ер солиғи — 8,2 миллиард сўм;
• бошқа солиқлар — 34 миллиард сўм.

18 август куни тадбиркорлар билан ўтказилаётган очиқ мулоқотда Шавкат Мирзиёев содда солиқ маъмурчилиги ва бюрократиясиз қулай муҳит яратиш борасида муҳим ташаббусларни илгари сурганди. Ўтказилган сўровларда қўшилган қиймат солиғи тўловчиларнинг 70 фоизи ушбу солиқни қайтаришда солиқ узилиши коэффициентини қўллаш, яъни Tax Gap тизими адолатсиз эканини билдирган. Солиқ тизимидаги коррупция билан боғлиқ шикоятлар ҳаддан ташқари кўпайиб кетгани ҳам айнан Tax Gap билан боғлиқ.

“Олаётган ойликларингни оқламаяпсизлар, халққа, тадбиркорга ёрдам бермаяпсизлар, тўсиқ бўляпсизлар. Мана, Tax Gap деган бало буларни қандай қийнаяпти, коррупцияга сабаб бўлаётгани учун тикка туриб қарсак чаляпти”, — деганди президент Солиқ қўмитаси раиси Шерзод Кудбиевга.

Сентябр бошидан эса Ўзбекистон қўшилган қиймат солиғини қоплаш (қайтариш)да солиқ узилиши коэффициентини қўллаш (Tax Gap) амалиёти тақиқланди.