Ўзбекистонда февраль ойида 25 млрд сўмлик ноқонуний давлат харидлари аниқланди
Ўзбекистонда 2023 йилнинг февраль ойида 25 млрд сўмлик ноқонуний давлат харидлари аниқланди. Бу ҳақда Коррупцияга қарши курашиш агентлиги ахборот хизмати хабар берди.
Агентлик давлат харидлари соҳасида февраль ойида ўтказилган таҳлил натижаларини эълон қилди. Унга кўра, вазирлик ва идоралар томонидан мазкур ойда жами 4,35 триллион сўмлик 77 411 та давлат хариди амалга оширилган бўлиб, шундан 234,2 миллиард сўмлик 39 006 та харид электрон дўкон, 25,5 миллиард сўмлик 1895 та харид электрон аукцион, 203 миллиард сўмлик 2103 та харид энг яхши таклифни танлаш, 107,5 миллиард сўмлик 521 та харид тендер, 1,5 триллион сўмлик 9989 та харид ягона етказиб берувчилар билан, 2,28 триллион сўмлик 23 897 та харид тўғридан тўғри шаклда амалга оширилган.
Қайд этилишича, ўрганишларда айрим давлат буюртмачилари томонидан давлат харидларини амалга оширишда қонунбузилиш ҳолатларига йўл қўйилаётганлиги аниқланмоқда. Жумладан, агентлик томонидан февралда жами 25 миллиард сўмлик қонунбузилиш ҳолатларини бартараф қилиш ҳамда келгусида шу каби ҳолатларига йўл қўймаслик ҳақида буюртмачиларга 26 та тақдимнома, аниқланган ҳолатларга ҳуқуқий баҳо бериш учун тўпланган ҳужжатлар ҳуқуқни муҳофаза қилувчи органларга юборилган.
Келтирилишича, Uzbekistan Airports АЖ буюртмачилигида 2023 йил 7 февраль куни 4,3 млрд сўмга жиҳозлар харид қилиш бўйича ўтказилган давлат хариди ўрганилганда “Давлат харидлари тўғрисида”ги қонуннинг 34-моддаси талабига зид равишда давлат харидлари жараёнида иштирокчиларга рақобатни чекловчи шартлар киритилгани аниқланган.
Шу каби “Ҳудудий электр тармоқлари” АЖ Хоразм ҳудудий филиали буюртмачилигидаги 10 февраль куни 2,6 миллиард сўмга “Темир-бетон устун” харид қилиш бўйича ўтказилган давлат хариди ўрганилганда “Давлат харидлари тўғрисида”ги қонуннинг 10, 14, 46-моддалари талаблари бузилгани маълум бўлди.
Шунингдек, Тошкент вилояти Болалар кўп тармоқли тиббиёт маркази буюртмачилигидаги 10 февраль куни 796 миллион сўмга тиббий асбоб ускуналар сотиб олиш бўйича ўтказилган давлат харидида аффилланганлик ҳолатларига баҳо берилмаганлиги аниқланди.
Мазкур ҳолатларда харид комиссияси томонидан ўзаро аффилланган иштирокчилар харид қилиш тартиб-таомилларида иштирок этишдан четлатилмасдан “Давлат харидлари тўғрисида”ги қонуннинг 23-моддаси ва “Рақобат тўғрисида”ги қонуннинг 14-моддаси талаблари бузилган.
Агентлик томонидан киритилган тақдимнома ва сўровномалар натижасида 12 та давлат хариди бекор қилинган ҳамда 7 та маъмурий иш қўзғатилган.
