Афғонистон миллий валютаси афғони “Толибон” бошқаруви остида дунёдаги энг даромадли валюталардан бирига айланди. Bloomberg агентлиги Афғонистон валюта курси динамикасини таҳлил қилиб, шундай хулосага келди.
Нашрга кўра, афғони валютаси 2022 йилда қарийб 14 фоизга, 2023 йилнинг охирги чорагида эса яна 9 фоизга ўсган. Агентлик бу ўсишнинг бир қанча сабабларини келтирди.
Аввало, бу “Толибон” томонидан олиб борилаётган молиявий сиёсатга боғлиқ: улар мамлакат ичида доллар ва Покистон рупиясидаги молиявий операцияларни тақиқлаб қўйган, Афғонистондан ташқарига Америка валютасини олиб чиққанларга жазо чораларини жорий қилган ва онлайн валюта савдосини тақиқлаган. Қоидабузарлар турлича жазоланиши, жумладан, қамалиши мумкин.
Бундан ташқари, катта ҳажмларда мунтазам равишда инсонпарварлик ёрдами етказиб берилиши ва Афғонистоннинг қўшни давлатлар билан ривожланаётган савдоси афғонини мустаҳкамлашда муҳим рол ўйнайди.
Айни пайтда, Bloomberg Афғонистондаги иқтисодий вазият ёмонлашиб бораётганини қайд этди. Ишсизлик ортиб бормоқда, қишлоқ аҳолисининг учдан икки қисми асосий эҳтиёжларни сотиб олишга қийналмоқда. Мутахассисларнинг фикрича, иқтисодий, сиёсий ва ижтимоий соҳалардаги беқарор вазият афғон валюта курсининг ўсиши қисқа муддатда тугашига, тез орада секинлашишига ва 2023 йил охирига келиб ҳозирги даражада барқарорлашишига олиб келади. Бундан ташқари, “Толибон”нинг аҳолига нисбатан репрессив чораларни мунтазам кучайтирувчи сиёсати оқибатида Афғонистон глобал ёрдамнинг муҳим қисмидан айрилиши мумкин, деб хулоса қилди Bloomberg.
Изоҳ (0)