Afg‘oniston milliy valyutasi afg‘oni “Tolibon” boshqaruvi ostida dunyodagi eng daromadli valyutalardan biriga aylandi. Bloomberg agentligi Afg‘oniston valyuta kursi dinamikasini tahlil qilib, shunday xulosaga keldi.
Nashrga ko‘ra, afg‘oni valyutasi 2022-yilda qariyb 14 foizga, 2023-yilning oxirgi choragida esa yana 9 foizga o‘sgan. Agentlik bu o‘sishning bir qancha sabablarini keltirdi.
Avvalo, bu “Tolibon” tomonidan olib borilayotgan moliyaviy siyosatga bog‘liq: ular mamlakat ichida dollar va Pokiston rupiyasidagi moliyaviy operatsiyalarni taqiqlab qo‘ygan, Afg‘onistondan tashqariga Amerika valyutasini olib chiqqanlarga jazo choralarini joriy qilgan va onlayn valyuta savdosini taqiqlagan. Qoidabuzarlar turlicha jazolanishi, jumladan, qamalishi mumkin.
Bundan tashqari, katta hajmlarda muntazam ravishda insonparvarlik yordami yetkazib berilishi va Afg‘onistonning qo‘shni davlatlar bilan rivojlanayotgan savdosi afg‘onini mustahkamlashda muhim rol o‘ynaydi.
Ayni paytda, Bloomberg Afg‘onistondagi iqtisodiy vaziyat yomonlashib borayotganini qayd etdi. Ishsizlik ortib bormoqda, qishloq aholisining uchdan ikki qismi asosiy ehtiyojlarni sotib olishga qiynalmoqda. Mutaxassislarning fikricha, iqtisodiy, siyosiy va ijtimoiy sohalardagi beqaror vaziyat afg‘on valyuta kursining o‘sishi qisqa muddatda tugashiga, tez orada sekinlashishiga va 2023-yil oxiriga kelib hozirgi darajada barqarorlashishiga olib keladi. Bundan tashqari, “Tolibon”ning aholiga nisbatan repressiv choralarni muntazam kuchaytiruvchi siyosati oqibatida Afg‘oniston global yordamning muhim qismidan ayrilishi mumkin, deb xulosa qildi Bloomberg.
Izoh (0)