Бирлашган Миллатлар Ташкилотининг Инсон ҳуқуқлари бўйича олий комиссари Фолкер Тюрк Ҳиндистонда янги қонун лойиҳасининг қабул қилинишини олқишлади: унга кўра, миллий ва штат парламентларидаги ўринларнинг учдан бир қисми аёллар учун ажратилади.
Ушбу қонун лойиҳаси Ҳиндистон парламентининг иккала палатаси томонидан қабул қилинган. Бу конституциявий равишда аёлларнинг парламентдаги вакиллигини мустаҳкамлайди ҳамда Ҳиндистонда аёлларнинг жамоатчиликдаги иштироки ва гендер тенглиги ҳуқуқларини таъминлаш йўлидаги муҳим қадам бўлади, дейилади БМТ Янгиликлар маркази хабарида.
Қонун лойиҳаси штатларнинг камида 50 фоизи томонидан ратификация қилиниши керак. Фолкер Тюрк штатларни ушбу ташаббусни қўллаб-қувватлашга чақирди.
Олий комиссар ўз баёнотида бутун дунёдаги парламент аъзоларини аёлларнинг сиёсий жараёнда тенг ҳуқуқли бўлишини таъминлаш учун зарур гендер квоталарини ўз ичига олган қонунчилик чораларини кўришга чақирди.
БМТ ҳуқуқ ҳимоячиси жамиятнинг барча қатламларида аёлларнинг сиёсий ҳаётда иштирок этиши учун қулай муҳит яратиш муҳимлигини таъкидлади.
“Бу Ҳиндистоннинг Барқарор ривожланиш мақсадлари ҳамда аёлларга нисбатан барча шаклдаги дискриминацияга барҳам бериш тўғрисидаги БМТ конвенция си бўйича мажбуриятларини амалга ошириш йўлидаги муҳим қадамдир”, — деди у.
Изоҳ (0)