Birlashgan Millatlar Tashkilotining Inson huquqlari bo‘yicha oliy komissari Folker Tyurk Hindistonda yangi qonun loyihasining qabul qilinishini olqishladi: unga ko‘ra, milliy va shtat parlamentlaridagi o‘rinlarning uchdan bir qismi ayollar uchun ajratiladi.
Ushbu qonun loyihasi Hindiston parlamentining ikkala palatasi tomonidan qabul qilingan. Bu konstitutsiyaviy ravishda ayollarning parlamentdagi vakilligini mustahkamlaydi hamda Hindistonda ayollarning jamoatchilikdagi ishtiroki va gender tengligi huquqlarini ta’minlash yo‘lidagi muhim qadam bo‘ladi, deyiladi BMT Yangiliklar markazi xabarida.
Qonun loyihasi shtatlarning kamida 50 foizi tomonidan ratifikatsiya qilinishi kerak. Folker Tyurk shtatlarni ushbu tashabbusni qo‘llab-quvvatlashga chaqirdi.
Oliy komissar o‘z bayonotida butun dunyodagi parlament a’zolarini ayollarning siyosiy jarayonda teng huquqli bo‘lishini ta’minlash uchun zarur gender kvotalarini o‘z ichiga olgan qonunchilik choralarini ko‘rishga chaqirdi.
BMT huquq himoyachisi jamiyatning barcha qatlamlarida ayollarning siyosiy hayotda ishtirok etishi uchun qulay muhit yaratish muhimligini ta’kidladi.
“Bu Hindistonning Barqaror rivojlanish maqsadlari hamda ayollarga nisbatan barcha shakldagi diskriminatsiyaga barham berish to‘g‘risidagi BMT konvensiyasi bo‘yicha majburiyatlarini amalga oshirish yo‘lidagi muhim qadamdir”, — dedi u.
Izoh (0)