Ҳиндистонда бўлиб ўтаётган G20 саммитида бош вазир Нарендра Моди мамлакатнинг ҳиндча номи ёзилган “табличка”дан фойдаланди. Бу ҳақда Reuters хабар берди.
Биринчи сессияда журналистлар Моди ўз мамлакатини ифодалаш учун “Бҳарат” ёзуви бўлган белгини танлаганини пайқади. Ҳиндистон Конституциясига кўра, инглиз ва ҳинд тиллари мамлакатнинг расмий тиллари бўлиб, мамлакат инглиз тилида Ҳиндистон ва ҳинд тилида Бҳарат деб аталади.
Аввалроқ Ҳиндистон ҳукумати мамлакат номини Бҳарат деб ўзгартириш бўйича резолюция киритиши мумкинлиги хабар қилинганди. Парламентда Ҳиндистон номини ўзгартириш тарафдорлари шу йўл билан мамлакат номи билан боғлиқ мустамлакачилик ўтмишидан халос бўлишга ишонган.
Мамлакат номи сифатида Бҳарат Ҳиндистоннинг амалдаги конституциясида учрайди.
“Британияликлар Бҳарат номини Ҳиндистонга ўзгартирган. Мамлакатимиз минг йиллар давомида Бҳарат номи билан танилган. Бу қадимги санскрит матнларида учрайдиган мамлакатнинг қадимий номи. Ҳиндистон номи мустамлакачи давлат томонидан берилган ва шунинг учун қуллик рамзи ҳисобланади. Ҳиндистон номи конституциядан олиб ташланиши керак”, — деган эди депутат Ражя Сабҳа.
Ҳиндистон ТИВ мамлакат номи Бҳаратга ўзгаришини рад этди
Ҳиндистон ташқи ишлар вазири Субраманям Жайшанкар мамлакат номи Бҳаратга ўзгаришини рад этди. Вазир Ҳиндистон конституциясида иккита расмий тил борлигини эслатди: инглиз ва ҳинд.
Ҳинд тилида мамлакат бошқа номга эга — Бҳарат (мустамлакачиликдан олдинги Ҳиндистоннинг тарихий номи). Жайшанкар мамлакат номини ўзгартириш режаси йўқлигини таъкидлади ва мухолифат партияларини конституцияни ўқишга чақирди.
Вазир “Бҳарат” атамасининг расмий протоколларда қайд этилиши аввалроқ бўлиши керак эди, деб ҳисоблайди.
“Президент Бхаратни танлаганидан фахрланамиз. Бу мустамлакачилик тафаккуридан узоқлашишга қаратилган яна бир қадамдир”, — деган у.
Ҳиндистон президенти Драупади Мурму номидан G20 саммити шарафига зиёфатга таклифномалар юборилганидан кейин мамлакат номини ўзгартириш масаласи пайдо бўлди. Таклифномада Ҳиндистон президенти ўрнига Бҳарат президенти деб ёзилганди.
Изоҳ (0)