Қозоғистон Ташқи ишлар вазирлиги мамлакатнинг Коллектив хавфсизлик шартномаси ташкилотидан (КХШТ) чиқиши эҳтимолини рад этди. Бу ҳақда Tengrinews хабар берди.
Қозоғистон Ташқи ишлар вазирлиги расмий вакили Айбек Смадияров Республика ва Арманистон КХШТдан чиқиш бўйича гўёки музокара олиб бораётгани ҳақидаги маълумотлар ҳақиқатга тўғри келмаслигини айтди.
“Қозоғистон ва Арманистон музокара олиб бораётгани ҳақида маълумотлар тарқалмоқда. Бу ҳақиқатга тўғри келмайди. Бир неча кун олдин КХШТга аъзо давлатлар ташқи ишлар вазирлари йиғилиши бўлиб ўтди. Унда ташкилотни ривожлантиришнинг кейинги йўллари, қандай йўл тутиши муҳокама қилинди. Шу боис биз ушбу йўналишда фаолият олиб боряпмиз”, — деди у брифингда.
Аввалроқ Арманистон бош вазири Никол Пашинян Арманистоннинг КХШТдан чиқиши масаласи кун тартибидан тушмаганини айтганди. Бундан олдин у мамлакат фуқароларига мурожаат билан чиққан ва Арманистоннинг ташқи хавфсизлик тизимининг самарасизлигини эълон қилиб, Россия тинчликпарвар контингентининг мақсадларига шубҳа билдирган.
Изоҳ (0)