Qozog‘iston Tashqi ishlar vazirligi mamlakatning Kollektiv xavfsizlik shartnomasi tashkilotidan (KXSHT) chiqishi ehtimolini rad etdi. Bu haqda Tengrinews xabar berdi.
Qozog‘iston Tashqi ishlar vazirligi rasmiy vakili Aybek Smadiyarov Respublika va Armaniston KXSHTdan chiqish bo‘yicha go‘yoki muzokara olib borayotgani haqidagi ma’lumotlar haqiqatga to‘g‘ri kelmasligini aytdi.
“Qozog‘iston va Armaniston muzokara olib borayotgani haqida maʼlumotlar tarqalmoqda. Bu haqiqatga to‘g‘ri kelmaydi. Bir necha kun oldin KXSHTga aʼzo davlatlar tashqi ishlar vazirlari yig‘ilishi bo‘lib o‘tdi. Unda tashkilotni rivojlantirishning keyingi yo‘llari, qanday yo‘l tutishi muhokama qilindi. Shu bois biz ushbu yo‘nalishda faoliyat olib boryapmiz”, — dedi u brifingda.
Avvalroq Armaniston bosh vaziri Nikol Pashinyan Armanistonning KXSHTdan chiqishi masalasi kun tartibidan tushmaganini aytgandi. Bundan oldin u mamlakat fuqarolariga murojaat bilan chiqqan va Armanistonning tashqi xavfsizlik tizimining samarasizligini e’lon qilib, Rossiya tinchlikparvar kontingentining maqsadlariga shubha bildirgan.
Izoh (0)