Самолёт бортида тартибни бузган россиялик Тошкент аэропортида жаримага тортилди. Бу ҳақда ИИВ Транспорт ва туризм объектларида хавфсизликни таъминлаш департаментига таяниб, “Газета.уз” хабар берди.
Қайд этилишича, “Тошкент” халқаро аэропортида HY-634 рейси билан Санкт-Петербургдан Тошкентга учиб келаётган Россия фуқароси К.В. қўлга олинган.
“Эркак маст ҳолда жамоат тартибини бузган: беҳаё сўзларни ишлатган, қўшиқлар куйлаган ва худди шу рейсда учаётган қизни ҳақоратлаган”, — дейилади хабарда.
Тошкент аэропортлари қўриқлаш бўлими инспекторлари унга нисбатан Маъмурий жавобгарлик тўғрисидаги кодексининг 183-моддаси (майда безорилик) билан баённома тузган.
19 сентябрь куни Сергели туман суди томонидан маъмурий ҳуқуқбузарлик тўғрисидаги иш кўриб чиқилиб, унга нисбатан БҲМнинг 3 баравари — 990 минг сўм миқдорида жарима белгиланди.
Эслатиб ўтамиз, 13 январь куни Россиянинг Москва — Бангкок йўналишидаги рейсни амалга ошираётган “Аэрофлот” авиакомпанияси самолёти шошилинч равишда Самарқандга қўнган, бунга ҳомиладор аёлнинг саломатлиги ёмонлашгани, шунингдек, бортда юзага келган жанжал сабаб бўлган эди.
18 январь куни эса “Аэрофлот” компанияси самолёти Москвадан Гоага учаётган вақтида Урганчга қўндирилди. АФЛ236 йўловчи рейси Гоа йўналиши бўйича учаётган вақтда маст ҳолатда зўравонлик қилган йўловчи сабаб Урганч халқаро аэропортидаги муқобил аэродромга келиб қўнган.
Изоҳ (0)