Наманган вилоятининг Чуст туманидаги болалар боғчаларида тарбияланувчи болаларнинг оммавий заҳарланиши кузатилган эди. Вилоят Мактабгача ва мактаб таълими бошқармаси заҳарланган болалар сони 71 нафар эканини билдирган бўлса, Бош прокуратура Чустда Фавқулодда ҳолат эълон қилинганини инкор этганди. Соғлиқни сақлаш вазирлиги баёнотига кўра, ҳолат вазир назоратига олинган. 

Наманган вилоятининг Чуст туманида мактабгача таълим ташкилотидаги болалар билан содир бўлган заҳарланиш ҳолати юзасидан Соғлиқни сақлаш вазирлиги барча керакли чора-тадбирларни амалга оширмоқда. Туман тиббиёт бирлашмасига қабул қилинган болаларнинг барчасига белгиланган стандартлар бўйича даво муолажалари олиб борилмоқда. Уларга якуний ташхис қўйиш мақсадида белгиланган талаблар асосида намуналар олиниб, экспертизадан ўтказилмоқда, — дейилади вазирлик баёнотида. 

Вазирликнинг билдиришича, айни пайтда болаларнинг ҳолати қониқарли, улардан 10 нафарининг аҳволи яхшилангани сабабли уйига рухсат берилган.

Туманда содир бўлган ушбу ҳолат шахсан Соғлиқни сақлаш вазири томонидан қатъий назоратга олинган. Мазкур ҳолат сабабларига ойдинлик киритилгач, қўшимча ахборот берилади, — дейди вазирлик вакиллари. 

Аввалроқ Бош прокуратура вояга етмаган болалар заҳарланиши юзасидан прокуратура томонидан терговга қадар текшириш ҳаракатлари олиб борилаётганини очиқлаганди.

Текшириш давомида вояга етмаган болаларнинг заҳарланиши сабаблари аниқланади ва бу ҳақида қўшимча равишда хабар қилинади. Вояга етмаган болалар нимадан заҳарланганлиги ҳали номаълум бўлганлиги сабабли жамоатчиликдан нотўғри ва турли тахминларга асосланган хабарларни тарқатмасликларни сўраб қоламиз. Текшириш жараёни назоратга олинган. Чуст туманида фавқулодда ҳолат эълон қилинганлиги ҳақидаги хабарлар ҳақиқатга тўғри келмайди, — дейилади Бош прокуратура ахборотида.