Тошкент метрополитенида Face-ID технологияси орқали тўловни амалга ошириш синовдан ўтказилмоқда. Бу ҳақда Транспорт вазирлиги матбуот хизмати хабар берди.

Қайд этилишича, мазкур технология йўловчиларга контактсиз тўлов қилиш имконини беради. Тўлов қилиш учун шунчаки турникетдаги камерага қарашнинг ўзи кифоя. Лойиҳа АТТО, “Алоқабанк”, Visionлабс компанияси билан ҳамкорликда амалга оширилмоқда.

АТТО компанияси масъули Абдуғофур Нурматовнинг айтишича, Face-ID ишлаши учун аввало йўловчиларнинг юзи ҳақидаги маълумотлар қурилманинг базасига киритилиши лозим. Бунинг учун йўловчи АТТО махсус иловасига кириб, тегишли функцияни фаоллаштириш орқали ўз юзини сканерлаши керак.

Иловага кирилганда транспорт карта балансини кўрсатувчи панелнинг ўнг бурчагида FaceПай тугмаси бор, шу тугма босилади ва йўловчининг юзи суратга олинади. Шундан сўнг, маълумотлар базасига унинг сурати қўшилгани, тизим фаоллаштирилгани ҳақидаги маълумот кўринади. Кейин эса АТТО транспорт картасида пул бўлса, тўловни Face ID орқали амалга ошириш мумкин бўлади. 

Эслатиб ўтамиз, 2021 йилда Тошкент метросида FaceПай тизими синовдан ўтказилганди. Унинг ёрдамида йўловчи шунчаки валидаторга қараб йўл ҳақи учун тўлов қилиши мумкин. Бунинг учун фойдаланувчи ўз юзини сканерлаши ва уни транспорт ёки банк картаси маълумотлари билан бирга маълумотлар базасига киритиши керак бўларди.