Адлия вазирлиги Жамоатчилик билан алоқалар бўлими Хадича Сулаймонова номидаги Республика суд экспертизаси маркази, Сенат ҳузурида мустақил ташкилот сифатида қайтадан ташкил этилиши айтилган хабарларга муносабат билдирди.
Қайд этилишича, Адлия вазирлиги ҳузуридаги Х.Сулаймонова номидаги Республика суд экспертиза маркази ўз фаолиятини тегишли норматив-ҳуқуқий ҳужжатлар асосида олиб бориб, ҳозирда Адлия вазирлигининг таркибий қисми ҳисобланади.
Бугунги кунда вазирлик томонидан Х.Сулаймонова номидаги Республика суд экспертиза марказини бошқа ташкилотлар таркибида, шу жумладан, Олий Мажлиси Сенати ҳузурида қайтадан ташкил этишга оид норматив-ҳуқуқий ҳужжат лойиҳалари ишлаб чиқилмаган.
“Ижтимоий тармоқ каналлари юритувчиларидан ёлғон ва нохолис,текширилмаган ахборотларни жамоатчиликка таркатиш орқали фуқароларимизда турли хил тушунмовчиликларни келтириб чиқаришга йўл қўймасликларини сўраб қоламиз”, — дейилади муносабатда.
Вазирлик Маъмурий жавобгарлик тўғрисидаги кодекснинг 202-2-моддасига кўра ёлғон ахборотни тарқатиш БҲМнинг 50 баравари миқдорда жарима солишга сабаб бўлишини эслатиб ўтган.
Эслатиб ўтамиз, 2019 йилда “Суд-экспертлик фаолиятини янада такомиллаштириш чора-тадбирлари тўғрисида”ги президент қарори қабул қилинган. Қарорга мувофиқ амалиётда илк бор нодавлат ташкилотлар томонидан суд-экспертлик фаолиятини амалга оширишнинг ҳуқуқий асослари яратилган эди.
Изоҳ (0)