Республика суд экспертизаси марказининг янги биноси ишга туширилди

Ўзбекистон Республикаси Адлия вазирлиги ҳузуридаги Х.Сулаймонова номидаги Республика суд экспертизаси марказида Президентнинг жорий йил 17 январдаги «Суд-экспертлик фаолиятини янада такомиллаштириш чора-тадбирлари тўғрисида»ги қарори ижроси доирасида амалга оширилган ишларга бағишланган матбуот анжумани бўлиб ўтди. Бу ҳақда ЎзА хабар берди.

Қарорга мувофиқ амалиётда илк бор нодавлат ташкилотлар томонидан суд-экспертлик фаолиятини амалга оширишнинг ҳуқуқий асослари яратилди.

Хусусан, нодавлат суд-экспертиза ташкилотларига суд экспертизаларининг 44 турини ўтказиш ҳуқуқи берилди. Уларни қайта тайёрлаш ва малака ошириш тизимини ташкил қилиш ҳамда суд эксперти сертификатини олган шахсларнинг Ягона рўйхатини ва нодавлат суд-экспертиза ташкилотлари рейтингини юритиш белгиланди.

Шунингдек, қарор билан 2019—2020 йилларда суд экспертлик фаолиятини янада такомиллаштириш бўйича 25 банддан иборат «Йўл харитаси» тасдиқланди ва унга асосан суд-экспертиза хизматлари фаолиятининг норматив-ҳуқуқий базасини такомиллаштириш, амалиётга янги инновацион ишланмаларни жорий этиш, суд экспертизаларининг турларини кенгайтириш, уларнинг сифати ва ишончлилигини ошириш режалаштирилган.

Шунингдек, марказнинг моддий-техник базасини мустаҳкамлаш, суд-экспертлик фаолиятига ахборот-коммуникация технологияларини жорий қилиш ҳамда ихтисослаштирилган нодавлат суд экспертиза ташкилотларини ривожлантириш йўналишлари белгиланган.

Қайд этилишича, марказ ходимларнинг ижтимоий муҳофазаси, моддий таъминоти тубдан яхшиланди ва ҳукумат қарорига асосан моддий-техник базани модернизация қилиш ва замонавий ускуналар билан жиҳозлаш учун 3,326 миллион доллар миқдорида маблағ ажратилди. Марказ тузилмасига бугунги кун талабларидан келиб чиққан холда ўзгартишлар киритилиб, бир қатор янги бўлимлар ташкил этилди ва ходимлар штат бирлиги сезиларли даражада оширилди.

Қайд этиб ўтилган йўналишнинг амалий натижаси сифатида Марказнинг янги ихтисослашган биноси қурилиб, фойдаланишга топширилди.

Қайд этилишича, ҳуқуқни муҳофаза қилувчи органлар ва судларнинг малакали суд экспертиза хулосаларига бўлган эҳтиёжларини, шунингдек, илғор хорижий тажрибани ҳисобга олган ҳолда суд экспертизанинг янги турлари жорий қилиш бўйича илмий-тадқиқот ишлари олиб борилмоқда.

Мазкур илмий ишлар суд-психологик экспертизаси, суд-электротехника экспертизаси, озиқ-овқат маҳсулотларининг суд экспертизаси, суд лингвистик экспертизаси, суд автомобиль йўллари экспертизаси ва суд компьютер-техник экспертизалари йўналишларида Ўзбекистон Фанлар академиясининг илмий-тадқиқот муассасалари ва олий таълим муассасалари билан ҳамкорликда 21 дан ортиқ тасдиқланган мавзуда либ борилмоқда.

Тадбир давомида марказнинг янги ихтисослаштирилган биносида медиа-тур ташкил этилиб, иштирокчиларнинг суд-экспертиза фаолиятига оид барча саволларига давлат суд экспертлари томонидан жавоб берилди.