Дунёдаги энг машҳур медиамагнат Руперт Мердок Fox корпорацияси раиси ва News Corp ижрочи раиси лавозимларини тарк этиб, бошқарувни ўғлига топширади. Бу ҳақда BBC хабар берди.
Мердок компаниялари Буюк Британия, АҚШ ва Австралиядаги энг машҳур янгиликлар брендини бошқаради. Расмий лавозимни топшириш жараёни ноябрь ойида бўлиб ўтади, ўшанда унинг ўғли Лахлан иккала ташкилот бошқарувини олади.
92 ёшли медиамагнат ўз баёнотида соғлиғи яхшилиги ва компаниялари сўнгги ўн йилликларда эришган ютуқларидан фахрланаётганини айтган. Мердок карьерасини 22 ёшида Австралиянинг Аделаида шаҳридаги иккита газета акцияларининг ярмини мерос қилиб олганида бошлаган. У охир-оқибат дунёдаги энг кучли медиамагнатга айланди.
Эндиликда у Fox Corporation ва News Corp.нинг фахрий раиси лавозимини эгаллаш ниятида.
“Профессионал ҳаётим давомида мен ҳар куни янгиликлар ва ғоялар билан банд бўлдим ва бу ўзгармайди. Лекин мен учун ҳақиқатан ҳам истеъдодли жамоалар, Лахланда иккала компаниянинг ягона раиси бўладиган иштиёқли, принципиал раҳбар борлигини билиб, турли ролларни ўйнаш вақти келди”, — деган Руперт Мердок.
У “газеталарни етказиб берадиган юк машиналари ҳайдовчиларига, офисдан чиққанда ишлайдиган фаррошларга, қўллаб-қувватловчи ёрдамчиларга ва камералар ёки компьютер кодлари ортидаги тажрибали операторларга” миннатдорлик билдирган.
“Компанияларимиз саломатлиги мен каби яхши”, — деди медиамагнат.
News Corporation медиахолдинги 1979 йилда ташкил этилган, 2012 йилда Мердок уни иккита мустақил компанияга ажратган. 2019- йилда медиамагнат Disney активларининг бир қисмини, жумладан Fox, FХ, National Geographic Networks кино ва телестудиялари ва Star India’даги улушини 71,3 миллиард долларга сотган. Forbes Real Time миллиардерлари рейтингида Мердок ва унинг оиласи 96-ўринни эгаллаб, уларнинг бойлиги 17,5 миллиард долларга баҳоланган.
Танишинг: Лахлан Мердок
Руперт Мердокнинг ўғли Лахлан News Corp компаниясининг ягона раиси бўлади ва Fox бош директори лавозимини давом эттиради. Лахлан Рупертнинг 1971 йилда туғилган иккинчи фарзанди.
У Fox and Nova Entertainment компаниясининг ижрочи раиси лавозимида ишлаган. Лахлан 21st Century Fox’нинг FOX каналини яратишига катта ҳисса қўшган. FOX’ни мустақил давлат компаниясига айлантиришга раҳбарлик қилган.
У дунёнинг кўплаб нуфузли нашриёт компанияларида сармоя ва ташкилий ишлар билан шуғулланган. Australian Financial Review маълумотларига кўра, унинг бойлиги тахминан 3,3 миллиард долларга баҳоланмоқда.