Россия президенти матбуот котиби Дмитрий Песков журналистлар билан бўлиб ўтган брифингда Россиянинг Тоғли Қорабоғ ўққа тутилган пайтдаги ҳаракатсизлигини “де-юре Озарбайжон ўз ҳудудида” ҳарбий ҳаракатлар олиб боргани билан изоҳлади.
“Айниқса, Арманистон томони Қорабоғни Озарбайжоннинг бир қисми сифатида тан олишга расман қарор қилганидан кейин бизга нисбатан бундай қоралашларни қабул қилмаймиз. Де-юре, ҳозир гап Озарбайжон Республикасининг ўз ҳудудидаги ҳаракатлари ҳақида кетяпти. Шундай экан, бизга қарши бундай айбловлар мутлақо асоссиздир. Ҳеч нарсага асосланмаган”, — деди Песков.
Матбуот котибининг қўшимча қилишича, Тоғли Қорабоғдаги Россия тинчликпарвар кучлар амалий ишларни қилади ва “оғзаки сафсата билан шуғулланмайди”.
“Қорабоғдаги арманлар билан алоқаларимиз давом этмоқда. Чунки бизнинг ҳарбийларимиз — улар бундай оғзаки сафсата билан шуғулланмайди. Улар аниқ ишларни қилади, тинчликпарвар сифатида ўз вазифаларини бажаради, тинч аҳолини, айниқса болаларни хавфли зоналардан эвакуация қилишга ёрдам беради, бу ишлар кечаю кундуз давом этади”, — деди Песков.
19 сентябрь куни Озарбайжон “конституциявий тузумни тиклаш” мақсадида Тоғли Қорабоғда “маҳаллий аксилтеррор тадбирлари” бошланганини эълон қилди, шундан сўнг тан олинмаган республика ҳудудини ўққа тута бошлади. Бу арман томонининг провокациялари, жумладан, Аҳмадбейли—Фузули—Шуша трассасида автомобиль портлаши оқибатида полиция ходимларининг ҳалок бўлиши билан изоҳланган.
Озарбайжоннинг операцияси давомида 20 сентябрь куни эрталабки ҳолатга кўра, Тоғли Қорабоғда 32 киши, жумладан, 7 нафар тинч аҳоли вакиллари ҳалок бўлди, 200 дан ортиқ киши, жумладан 35 нафари тинч аҳоли вакиллари яраланди.
Арманистон Хавфсизлик кенгаши котиби Армен Григорян Россияни отишма пайтида ҳаракатсизлик қилишда айблади:
“2020 йил 9 ноябрда Арманистон, Россия ва Озарбайжон раҳбарлари имзолаган баёнотга кўра, Россия Тоғли Қорабоғ аҳолисини ҳимоя қилишга мажбур. Россия эса бу мажбуриятни бажармаяпти”, — деди Григорян.
Россия Мудофаа вазирлиги 20 сентябрь куни эрталаб икки мингдан ортиқ одам “энг хавфли ҳудудлардан” эвакуация қилингани ҳақида хабар берди. Кейинроқ тан олинмаган Тоғли Қорабоғ республикаси расмийлари маҳаллий вақт билан соат 13:00 дан (Тошкент вақти билан 14:00) ўт очишни тўлиқ тўхтатиш бўйича келишувга эришилганини маълум қилди.
Изоҳ (0)