Ўзбекистоннинг Польшадаги элчиси Баҳром Бобоев Luba Sohn Holding компанияси раҳбари Кшиштоф Слаби билан учрашди. Бу ҳақда “Дунё” агентлиги хабар берди.
Қайд этилишича, мулоқот чоғида Ўзбекистонда турар жойлар, бинолар ва саноат иншоотларини термал модернизациялашда қўлланадиган кўпикли полистирол блоклар (пенопласт) ҳамда бутловчи қисмлар ишлаб чиқарувчи завод қурилишига тўғридан тўғри сармоя киритиш масаласи муҳокама қилинган.
Янги завод қурилиши учун режалаштирилган инвестициялар ҳажми тахминан 7-10 миллион долларни ташкил этади. Завод 300-400 нафар кишини иш билан таъминлаш имкониятига эга бўлади. Маълум қилинишича, завод йилига қалинлиги 30-200 миллиметргача бўлган 300 минг кубометр пенопласт ва келажакда унга қўшимча тўрлар, елим, пойдевор болтлари, илгаклар, акрил сувоқ, моғор ва намланишга қарши воситалар ишлаб чиқариш қувватига эга бўлади.
Беш гектар майдонни ташкил этувчи завод ишлаб чиқариш бўлимлари, логистика маркази, лаборатория, тайёр маҳсулот омборлари ва бошқаларни ўз ичига олади.
Польша томонига Ўзбекистоннинг сармоявий имкониятлари, хорижий инвесторлар учун яратилган имтиёз ва енгилликлар, мамлакат ҳудудларида ташкил этилган эркин иқтисодий ва кичик саноат зоналари фаолияти ҳақида батафсил маълумот берилди.
Ўзбекистон элчихонаси тез орада инвестиция билан боғлиқ масалаларни муҳокама қилиш мақсадида Luba Sohn Holding ва “Ўзқурилишматериаллари” АЖнинг масъул ходимлари ва мутахассислари иштирокида видеоконференция ташкил этади. Унинг натижасида Польша компанияси делегациясини октябрь ойида Ўзбекистонга юбориш тўғрисида қарор қабул қилинади.
Бундан олдин Хитой компанияси Андижонда қуёш фотоэлектр станциясини, Жанубий Корея эса Ўзбекистонда полигонлардан чиқаётган газларни ушлаб қолувчи объект қуриши тўғрисида хабар берилганди.
Изоҳ (0)