Озарбайжон президенти Илҳом Алиев Тоғли Қорабоғда “антитеррор чоралари” ва уларнинг “муваффақиятли якунланиши” натижасида мамлакат ўз суверенитетини тиклаганини айтди. Бу ҳақда Репорт.аз хабар берди.
Алиевнинг сўзларига кўра, Тоғли Қорабоғда жойлашган арман армиясининг катта қисми “бутунлай йўқ қилинган”.
“Арманистон томонининг ҳарбий техникаси йўқ қилинди ва яроқсиз ҳолга келтирилди. Озарбайжон ҳудудида Арманистонга тегишли 100 дан ортиқ танк ва зирҳли техника, 200 дан ортиқ артиллерия қуроллари жойлашган эди”, — дейди Алиев.
Сиёсатчи 2020 йил ноябрида Иккинчи Қорабоғ урушидан кейин тузилган келишувга зид равишда Арманистон “уч йилдан бери ўз қуролли кучлари ва техникасини Озарбайжон ҳудудидан олиб чиқмаганини” айтди.
“Биз бунга ҳам аниқ қуроллар, ҳам қуролли кучларимизнинг профессионаллиги ёрдамида эришдик. Фуқаролик инфратузилмасига зарар етказмаслик, аммо ҳарбий инфратузилмани ишдан чиқариш кераклиги ҳақида кўрсатмалар берилди”, — дейди Озарбайжон президенти.
Алиевнинг айтишича, агар Қорабоғдаги ноқонуний қуролли гуруҳлар қуролларини ташламаганида Озарбайжон “охиригача борган бўларди”. Сиёсатчи аксилтеррор тадбирлари давомида Озарбайжон ҳарбийлари орасида ҳалок бўлганлар ва яраланганлар борлигини айтди.
- 19 сентябрь куни Озарбайжон “конституциявий тузумни тиклаш” мақсадида, Тоғли Қорабоғда аксилтеррор операциясини бошлади. Тахминан бир кун ўтгач, ўт очишни тўхтатиш тўғрисида келишиб олинди.
- Россия тинчликпарвар кучлари Озарбайжон, Арманистон ва Россия имзолаган уч томонлама келишувларга мувофиқ 2020 йилдан бери Тоғли Қорабоғда бўлиб келмоқда.
- Россия президенти матбуот котиби Дмитрий Песков Тоғли Қорабоғда содир бўлаётган воқеаларни Озарбайжоннинг ички иши деб атади ва “де-юре Озарбайжоннинг ўз ҳудудидаги ҳаракатлари ҳақида гапираётганини” таъкидлади.
Изоҳ (0)