Болливуд киноолами ўзининг романтик фильмлари билан машҳур. Сўнгги йилларда жуда таъсирли ва юракни эзувчи кўплаб фильмлар яратилди. Қуйида эътиборингизга сизни хавотирга соладиган ва кўз ёш тўкишга мажбур қиладиган машҳур ҳинд фильмлари ҳавола этилади.
“Ўзгача севги”
“Ўзгача севги” — Ракҳа Раҳмоннинг оҳангдор мусиқаси билан янада таъсирчан бўлган, 2021 йилда суратга олинган блокбастер. Фильмда уйидан қочиб кетган ва оила аъзолари ўғирлаб кетган нотаниш кишига турмушга берган қизнинг ҳаёти ҳақида ҳикоя қилинади. Қиз шизофрения билан касалланган ва хаёлидаги йигитни севиб қолган. Фильмда йигит ўз севгиси ва сабри билан қизнинг муаммони енгишига қандай ёрдам бериши жуда яхши кўрсатиб беради. Лойиҳадаги актёрлик ва операторлик ишини юқори баҳолаш мумкин. Ундаги мусиқалар ҳам томошабинни ўзига жалб этмасдан қўймайди.
“Менинг ёқимтойим Бинду”
Фильм 2017 йилда суратга олинган. Бу лойиҳа икки болаликдаги дўстларнинг ҳақиқий ва беғубор севгисини кўрсатади. Кинокартина севги нақадар соф бўлиши мумкинлигини кўрсатиб беради. Гарчи фильм катта хитга айлана олмаган бўлса-да, томошабинлар қалбини забт эта олди. Лойиҳада Чопра ва Хуррана ажойиб жуфтлик ролини ижро этган.
“Бечора юрак”
Бу лойиҳа Сушант Сингх Ражпут иштирокидаги сўнгги фильм. “Бечора юрак” 2020 йилда суратга олинган. Фильм Голливуднинг “Юлдузлар айбдор” фильмининг ремейки ҳисобланади. Кеси ва Менни — уларнинг иккаласи ҳам даволаб бўлмайдиган дардга чалинган бўлса-да, бир-бирига кўнгил қўйиб, оддий инсонлар сингари ҳаёт кечиради. Бу фильм ҳам томошабинни кўз ёш тўкишга мажбур қилади. Кинокартина ўзининг кинематографияси ва ажойиб мусиқаси билан сизни ўзига ром этади.
“Ошиқ қалблар”
“Ошиқ қалблар” — севги ва дўстликнинг гўзаллигини кўрсатадиган таъсирли фильм. Фильмда тасодифан зиёфатда “қулоқсиз” йигит Аянни учратиб қолган (Ранбир Капур ижросида) Ализанинг (бу ролни Аннушка Шарма ижро этган) тақдири ҳақида ҳикоя қилинади. Уларнинг иккаласи ҳам шахсий ҳаётида қийин даврни бошдан кечирмоқда ва шу сабабли бир-бири билан яхши дўстлардек мулоқот қилишади. Уларнинг дўстлиги Аян Ализага нисбатан муҳаббатни ҳис қилмагунча кучайиб боради. Ализа севгисини ошкор этишдан олдин ўзининг собиқ севгилиси Али (Фавад Хон ижросида) билан учрашади ва у билан турмуш қуришга қарор қилади.
Юраги яраланган Аян Сабадан (Айшваря Рай Баччан) тасалли излайди, бироқ у Ализа ва унинг ўзига бўлган ҳис-туйғуларини унута олмайди. Фильм 2016 йилда суратга олинган. Кинокартина суратга олинганига бир неча йиллар бўлган бўлса-да, у ҳалигача томошабинларнинг севимли фильмлари қаторида туради.
“Магистрал йўл”
Фильмда бош қаҳрамон Вира (Алия Бҳатт ижросида) ўз тўйига кўрилаётган тайёргарликлардан чарчаб, бўлажак турмуш ўртоғи билан бирор жойга боришни истайди. Куёв унинг тилагини амалга оширади. Улар ёнилғи қуйиш шохобчасига тўхтаганда, Вирани ниқобли безорилар ўғирлаб кетади. Кейинчалик қиз уни ўғирлаган инсонни севиб қолади. Фильмдаги актёрлар ўртасидаги муносабатлар томошабинни ҳайратга солади. Фильм охирида Вира ҳеч қандай ташқи босимсиз бутунлай ўзи қарор чиқара олишини тушуна бошлайди.
“Телба ошиқ”
Лойиҳа 2013 йилда суратга олинган, бироқ шунга қарамай, кинокартинани неча марта томоша қилишингиздан қатъи назар, у сизни ҳар доим ўзига ром этади. Фильмдаги мусиқалар ва сюжет жуда ажойиб яратилган. Лойиҳада Кунданнинг ўз севгиси учун қандай тўсиқларни енгиб ўтиши кўрсатилган. Бош қаҳрамон Шанкар Зоя бошқа бировни севишини билиб, ўз севгисини қурбон қилади. Фильмда севги ва нафратнинг ёнма-ёнлиги, турли табақалардаги инсонларнинг муҳаббат йўлидаги қийинчиликлари кўрсатилган.
“Ширин орзулар”
Фильмда Руми (Таапси Панну) ва Вики (Викки Каушал) исмли қаҳрамонлар бир-бирига ошиқ бўлади. Румининг оила аъзолари жуфтликнинг яширин муносабатлари ҳақида хабар топганидан кейин уларни турмуш қуришга мажбурлашади. Бироқ Викки Румининг ота-онасидан унинг қўлини сўраш илтимосини бажаришдан бош тортади. Охир-оқибат, қизнинг йигитдан кўнгли қолади ва келишилган никоҳга рози бўлади. Ана шунда Робби (Абхишек Баччан) туфайли севги учбурчаги юзага келади.
“Қароқчи”
Фильмдаги воқеалар 1990 йилларга бориб тақалади, бадавлат инсоннинг қизи фирибгарни севиб қолади, йигит уни ташлаб кетади. Кейинчалик улар кутилмаган шароитда яна учрашади ва у бир пайтлар севган инсонининг ҳаёти хавф остида эканини билиб олади. Фильмнинг иккинчи ярми “Сўнгги япроқ” романи асосида суратга олинган. Фильм 2013 йилда экран юзини кўрган ва кўплаб олқишларга сазовор бўлган.
Изоҳ (0)