АҚШ ва Эрон маҳбусларни алмашди. Америка ҳукумати Ислом Республикасининг беш фуқаросини, Эрон ҳукумати эса беш америкаликни озод қилди. Бу ҳақда CBS телеканали хабар бермоқда.
Айирбошлаш Қатар пойтахти Доҳада 19 сентябрга ўтар кечаси бўлиб ўтди.
Озод қилинган АҚШ фуқаролари орасида Сиямак Намозий, Эмад Шарги ва Морад Таҳбаз бор, улар Ислом Республикаси суди томонидан жосусликда айбланиб, 10 йиллик қамоқ жазосига ҳукм қилинганди. АҚШ расмийларига кўра, озод этилган яна икки америкалик, жумладан, бир аёл собиқ БМТ расмийси — уларнинг исми сир тутилган. 51 ёшли тадбиркор Намозий 2015 йилдан, тадбиркор Шарги ва эколог Таҳбаз 2018 йилдан бери қамоқда эди.
Эрон давлат оммавий ахборот воситалари Америка озод қилган икки эронликнинг исмини маълум қилди: Меҳрдод Моин Ансорий ва Ризо Сарҳангпур Кафраний. Улар АҚШда нима сабабдан қамалганига аниқлик киритилмаган.
Маҳбусларни алмашишдан олдин Қўшма Штатлар ва Эрон ўртасида Эроннинг Жанубий Кореяда сақланаётган 6 миллиард долларлик активларини блокдан чиқариш бўйича келишув имзоланган эди.
Эрон Марказий банки раҳбари Муҳаммад Ризо Фарзин давлат телевидениеси орқали гапирар экан, Ислом Республикасининг Қатардаги ҳисобларига маблағлар тушганини тасдиқлади.
Бу воқеалар 2018 йилда бошланган мамлакатлар ўртасидаги муносабатлар ёмонлашувидан сўнг АҚШ ташаббуси билан биринчи маҳбуслар алмашинуви ва Эрон активларининг илк марта блокдан чиқарилиши бўлди.
Изоҳ (0)