AQSH va Eron mahbuslarni almashdi. Amerika hukumati Islom Respublikasining besh fuqarosini, Eron hukumati esa besh amerikalikni ozod qildi. Bu haqda CBS telekanali xabar bermoqda.

Ayirboshlash Qatar poytaxti Dohada 19-sentabrga o‘tar kechasi bo‘lib o‘tdi.

Ozod qilingan AQSH fuqarolari orasida Siyamak Namoziy, Emad Shargi va Morad Tahbaz bor, ular Islom Respublikasi sudi tomonidan josuslikda ayblanib, 10 yillik qamoq jazosiga hukm qilingandi. AQSH rasmiylariga ko‘ra, ozod etilgan yana ikki amerikalik, jumladan, bir ayol sobiq BMT rasmiysi — ularning ismi sir tutilgan. 51 yoshli tadbirkor Namoziy 2015-yildan, tadbirkor Shargi va ekolog Tahbaz 2018-yildan beri qamoqda edi.

Eron davlat ommaviy axborot vositalari Amerika ozod qilgan ikki eronlikning ismini ma’lum qildi: Mehrdod Moin Ansoriy va Rizo Sarhangpur Kafraniy. Ular AQSHda nima sababdan qamalganiga aniqlik kiritilmagan.

Mahbuslarni almashishdan oldin Qo‘shma Shtatlar va Eron o‘rtasida Eronning Janubiy Koreyada saqlanayotgan 6 milliard dollarlik aktivlarini blokdan chiqarish bo‘yicha kelishuv imzolangan edi.

Eron Markaziy banki rahbari Muhammad Rizo Farzin davlat televideniyesi orqali gapirar ekan, Islom Respublikasining Qatardagi hisoblariga mablag‘lar tushganini tasdiqladi.

Bu voqealar 2018-yilda boshlangan mamlakatlar o‘rtasidagi munosabatlar yomonlashuvidan so‘ng AQSH tashabbusi bilan birinchi mahbuslar almashinuvi va Eron aktivlarining ilk marta blokdan chiqarilishi bo‘ldi.