Эрон Европа Иттифоқи тузилмаларида ишлаган Швеция фуқаросини ҳибсда сақламоқда. Бу ҳақда Politico хабар берди.
Маълум қилинишича, қўлга олинган Швеция фуқароси Ислом Республикаси ҳудудида жиноят содир этган, унинг иши судга ўтказилади. Гап жосусликда айбланиб 500 кундан ортиқ Эрон қамоқхонасида қолаётган швед Йохан Флодерус ҳақида кетмоқда.
Европа Иттифоқи ва Швеция дипломатик корпусда ишлаган Флодеруснинг Эронда ҳибсга олинганини бир йилдан ортиқ вақт давомида яшириб келган. Европа Иттифоқи дипломатияси раҳбари Жозеп Боррел Флодерусни озод қилишга ҳаракат қилишаётганини айтди.
Эрон расмийси ҳибсга олинган шахснинг исмини ошкор қилмаган, бироқ хорижлик Эрон ҳудудида “жиноят содир этишда” айбланаётганини даъво қилмоқда.
The New York Times газетасининг ёзишича, Флодерус дўстлари билан Эронга сайёҳ сифатида келган, бироқ 2022 йил 17 апрелда Теҳрондан жўнаб кетишидан олдин ҳибсга олинган. Ўша йилнинг июль ойида Эрон ҳукумати Швеция фуқаросини жосуслик учун ҳибсга олганини эълон қилган.
Ҳозирда у Эвин қамоқхонасида сақланмоқда. Флодерус аввалроқ ҳам Эронга иш юзасидан борган, бироқ ҳеч қандай воқеа содир бўлмаган.
Эрон Флодерусни жосусликда айбламоқда, исми ошкор этилмаган олти киши унинг разведка ишларига алоқадор эмаслигини айтган.
Швеция Ташқи ишлар вазирлиги “2022 йил апрелида Эронда Швеция фуқароси” ҳибсга олиниши билан боғлиқ иш устида фаол иш олиб бораётганини тасдиқлаган, аммо ошкоралик музокараларни мураккаблаштиришини қўшимча қилган.
Изоҳ (0)