АҚШ давлат котиби Энтони Блинкен АҚШ ва Эрон ўртасидаги маҳбусларни алмашиш бўйича келишув доирасида Эроннинг 6 миллиард долларлик музлатилган активларини Жанубий Кореядан Қатарга ўтказишга рухсат берувчи буйруқ чиқарди. Бу ҳақда 12 сентябрь куни AP ва Reuters агентлиги АҚШ Конгресси қабул қилган билдиришномага таяниб хабар берди.
Вашингтон ва Теҳрон ўртасидаги келишувнинг умумий шартларига кўра, Эрон томонидан ҳибсга олинган беш нафар Америка фуқаросига активларни блокдан чиқариш ва АҚШда сақланаётган беш нафар эронликни озод қилиш эвазига мамлакатни тарк этишга рухсат берилади, деб ёзмоқда Reuters. Конгрессга юборилган билдиришномада АҚШ расмийлари ўз фуқароларини Эрондаги қамоқдан озод қилиш бўйича келишув доирасида беш нафар эронликни қўйиб юбориши илк бор расман тасдиқланган.
Эрон блокдан чиққан маблағларни фақат гуманитар эҳтиёжлар учун сарфлай олади
Ҳужжатда таъкидланганидек, ўтказилган маблағлар Эронга фақат инсонпарварлик мақсадларида сарфлаш учун берилади. Музокаралар билан таниш бўлган саккиз нафар Reuters манбасига кўра, 6 миллиард долларлик ўтказма ва маҳбуслар алмашинуви кейинги ҳафтада амалга оширилиши мумкин.
Эрон август ойида АҚШнинг тўрт фуқаросини Теҳрондаги қамоқхонадан уй қамоғига ўтказган эди. Блинкен буни уларнинг уйга қайтишига олиб келадиган жараённинг бошланиши деб атади. АҚШ Эрондан қайтаришни режалаштираётганлар орасида тадбиркорлар Сиамак Намозий ва Эмад Шарқий, шунингдек, эколог Морад Таҳбаз бор, деб ёзади Reuters. Яна икки кишининг шахси ошкор этилмаган. Агентликлар Вашингтон Теҳронга кимларни топширишини аниқлай олмади.
Изоҳ (0)