Россия Давлат Думаси Кенгаши бир овоздан қабул қилган қарорга кўра, 2024 йилдан бошлаб депутатлар ўз сайлов округларида ваколатларини бажариш чоғида фақат Россияда ишлаб чиқарилган автомобиллардан фойдаланади.
Давлат Думаси спикери Вячеслав Володиннинг сўзларига кўра, Москвада депутатлар аллақачон расмий транспорт воситаларини маҳаллий брендларга алмаштиришни бошлаган. Володиннинг фикрича, бу қарорлар “Россия автомобилсозлик саноатини ривожлантиришга ёрдам беради, бюджет маблағлари мамлакатда қолади”.
3 август куни ишлаб чиқариш корхоналари раҳбарлари билан учрашувда Владимир Путин мансабдор шахслар учун давлат томонидан хорижий автомобиллар харид қилишни тўхтатишни талаб қилиб, мамлакатдаги барча давлат хизматчилари маҳаллий автомобилларда юриши кераклигини айтганди. Эртаси куни Вячеслав Володин депутатлар ишни “ўзларидан бошлаши”ни ҳамда “Москвич”, “Лада” ва “Арус” автомашиналаридан фойдаланишини айтди.
Путиннинг ташаббуси 1997 йилда бош вазир ўринбосари бўлиб турган Борис Немцов томонидан илгари сурилган ғояни такрорлайди. 1997 йил 1 апрелда президент Борис Ельциннинг ҳукумат амалдорлари учун хорижий автомобилларни сотиб олишни тақиқловчи фармони кучга кирди. Бироқ тажриба муваффақиятсиз тугади, жумладан маҳаллий автомобилларни бошқаришга ҳаракат қилган амалдорлар носозликлар ҳақида доимий равишда шикоят қиларди. Икки йил ўтгач, бу вақт давомида чет эл машинасини ҳайдашда давом этган Ельцин ўз буйруғини бекор қилиш тўғрисидаги фармонга имзо чекди.
Изоҳ (0)