Қирғизистон ва Тожикистон чегарасида чегара ҳудудлари аҳолиси ўртасида янги конфликт юзага келди. Бу ҳақда 24.kg хабар берди.
Қирғизистон Миллий хавфсизлик давлат қўмитаси чегара хизматининг хабар беришича, ҳодиса Тожикистондан Қирғизистон ҳудудидан ўтувчи Ворух анклавига олиб борадиган йўлда содир бўлган.
“Қирғизистоннинг икки фуқароси шахсий автомобилида Оқ-Сай—Кўк-Тош автомобиль йўли бўйлаб кетаётган бўлган. Шу пайт Тожикистон фуқароларига тегишли бўлган саккизта машинадан иборат карвон Ворух анклавидан Хўжай-Ало қишлоғи томон йўл олган”, — дейилади хабарда.
Тожикистон фуқаролари машиналарида Қирғизистон фуқароларининг йўлини кесиб ўтмоқчи бўлган. Оқибатда Дача массивида икки давлат фуқаролари ўртасида жанжал келиб чиққан.
Конфликт авж олишининг олдини олиш мақсадида воқеа жойига Қирғизистон Ички ишлар вазирлиги ҳудудий бўлинмаси ходими етиб келган. Бироқ у воқеа жойига яқинлашганда, Тожикистон фуқаролари — Хўжай-Ало қишлоғи аҳолиси унга ҳужум қилгани айтилмоқда.
“Қирғизистон Ички ишлар вазирлиги ходими у ердан чиқиб кетишга муваффақ бўлган, бироқ Тожикистон фуқаролари уни калтаклашга уринган, шунингдек, машинасининг орқа кўзгусини ҳам синдирган”, — дейилади хабарда.
Таъкидланишича, ҳозирда икки давлат чегарачилари вазиятни тинчлантириш бўйича музокаралар олиб бормоқда.
Изоҳ (0)