Қирғиз—тожик чегарасининг участкаларидан бирида икки давлат вилоятлари аҳолиси ўртасида конфликт юзага келди. Тожикистон Миллий хавфсизлик давлат қўмитаси чегара қўшинлари ҳодисага муносабат билдирди.
Тожикистон томонига кўра, тахминан соат 17:30 ларда Ворух қишлоқ аҳолисига тегишли 8 та автомашина тўй учун Исфара шаҳри томон ҳаракатланган. Оқ-Сай қишлоғига кираверишда Мерседес-Бенз русумли автомашинани бошқараётган Қирғизистон фуқароси тожикистонликларнинг йўлини тўсган. Бунга Тожикистон фуқаросининг автомобилларидан бири унинг ҳаракатига тўсқинлик қилгани сабаб қилиб кўрсатилган.
Таъкидланишича, Қирғизистон фуқароси маст ҳолатда бўлган, у ҳамюрти билан машинадан тушиб, Тожикистон фуқароларининг транспорт воситаларига тош отишни бошлаган. Оқибатда 3 та автомобиль шикастланган, 4 нафар Тожикистон фуқароси енгил тан жароҳати олган. Воқеа жойига Тожикистон ва Қирғизистон маҳаллий ҳокимият ва ҳуқуқ-тартибот идоралари ходимлари етиб келгач, музокаралар олиб борилган ва можарога барҳам берилган.
Эслатиб ўтамиз, Қирғизистон томони Тожикистон фуқаролари машиналарида Қирғизистон фуқароларининг йўлини кесиб ўтмоқчи бўлгани, оқибатда жанжал юзага келганини билдирганди. Қирғизистон Ички ишлар вазирлиги ходими ҳам ҳужумга учрагани айтилган.
Изоҳ (0)