Кривой Рогда полиция маъмурий биносига рус ракетаси келиб тушди, деди Украина Ички ишлар вазирлиги раҳбари Игор Клименко. Украина бош прокуратураси 26 киши яралангани ва бир киши ҳалок бўлганини маълум қилди.
Кривой Рог жойлашган Днепропетровск вилояти раҳбари Сергей Лисак ракета урилганидан кейин ёнғин бошлангани, олов майдони 200 квадрат метрга яқин бўлганини айтди. Кейинроқ Лисак ҳужумда жабрланганлар сони 32 кишига етганини маълум қилди.
Бино вайроналари остида қолган уч киши оғир аҳволда касалхонага ётқизилди, деб қўшимча қилди у.
.jpg)
Днепропетровск вилояти раҳбарининг сўзларига кўра, полиция биноси ёнида жойлашган турар жой бинолари ҳам ракета ҳужумидан жабр кўрган. Зарар даражасини аниқлаш учун уйма-уй текширув ўтказилмоқда.
Россия армияси Кривой Рог — Владимир Зеленскийнинг она шаҳрига мунтазам равишда ракета ҳужумларини уюштириб келмоқда.
8 сентябрга ўтар кечаси Россия қўшинлари Одесса вилоятига Shahed дронларидан ҳужум қилган эди. Бу бир ҳафта ичида Одессага бешинчи ҳужум бўлди. Тунда Суми ва Запорожье вилоятлари ҳам ракета ҳужумларига учради.
Изоҳ (0)