Тошкентда 13 сентябрь куни “Дунё бўйлаб” телеканалининг 31 ёшли бошловчиси Рамина Ягафарова вафот этди. Бу ҳақда Бош прокуратура матбуот хизмати “Дарё”га маълум қилди.
Идора маълумотларига кўра, 12 сентябрь кечқурун Рамина Ягафарова Чилонзор туманидаги хусусий клиникада даволанаётган онасининг ёнига келган. Журналист томоғи оғригани сабабли ўзининг ёнида бўлган левофлоксацин (антибиотик) дорисидан бир дона ичган, орадан 10-15 дақиқа ўтиб эса унда тутақаноқ кузатилган ва ҳушини йўқотган.
Клиника шифокорлари томонидан аёлга биринчи ёрдам кўрсатилган ва у реанимация бўлимига ётқизилган, олиб борилган даво муолажалари натижасида Ягафарова ҳушига келган, аҳволи яхшиланган.
Бироқ 13 сентябрь куни соат 16:00 ларда Ягафаровани такроран тутқаноғи тутиб, кўрсатилган тиббий муолажаларга қарамай соат 17:50 да биологик ўлим ҳолати қайд этилган.
Суд-тиббиёт экспертизаси маълумотларига кўра, журналистнинг ўлими “Доридан аллергик реакция. Бош мия ҳамда ўпка ўткир шиши, ўткир нафас олиш ва юрак-қон томир етишмовчилиги. Анафилактик шок”, туфайли юзага келган.
Ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
Эслатиб ўтамиз, май ойида “Ёшлар” телеканалининг “Янги давр” дастури телебошловчиси, журналист Нозима Маҳмудова вафот этганди. У юрак операциясидан кейин ҳаётдан кўз юмган. Мартда бўлса журналист ва шоир, “Инсон ва қонун” газетаси ҳамда “Ҳуқуқ ва бурч” журнали бирлашган таҳририяти ходими Акмал Тошев вафот этгани тўғрисида хабар берилганди.
Изоҳ (0)