Стационар шароитда антибиотикларни қўллаш чоғида кузатилиши мумкин бўлган хавфли реакциялар юз берганда беморга қандай ёрдам бериш кераклиги бўйича Фармакологик назорат бўлими етакчи мутахассиси Равшан Абдуллаев ўз фикларини билдирди.
Мутахассиснинг айтишича, мабодо антибиотик дори воситаси қабул қилинганидан кейин ножўя таъсир реакцияси ривожланса, биринчи навбатда энг хавфли анафилактик ёки аллергик шок кузатилиши мумкин.
“Анафилактик ёки аллергик шокни ўз вақтида, иложи борича тез фурсатда аниқлаш лозим. Кўпинча буни фақат ихтисослашган мутахассисгина қилиши мумкин.
Бунда мутахассис ножўя таъсирнинг шоклигини ва даражасини аниқлайди. Ундан кейин шунга мувофиқ ёрдам кўрсатади. Биринчи шокка қарши дори воситалари керак бўлади. Гоҳида улар ҳам етарли бўлмай қолганда шокдан чиқариш учун қўшимча ускуналар лозим бўлади. Масалан, кислород ниқоби. Тезда юракни муолажа қилишга тўғри келади. Агар юрак тўхтаб қолиб, фибрилация юз берса, дефибриллятор керак бўлади.
Юқорида мен санаб ўтган муолажалар фақатгина бемор ҳаётини сақлаб қолиш учунгина амалга ошириладиган ишлардир. Ундан кейин, яъни бемор шок ҳолатидан чиқарилганидан кейин тўлиқ стационар даволаниши лозим”, — деди Равшан Абдуллаев.
Мутахассис юқоридаги муолажаларни уй шароитида қилса бўладими, деган саволга жавоб берди.
“Йўқ, уй шароитида қилиб бўлмайди. Шунинг учун бундай дори воситаларини фақат шифохонада — ихтисослаштирилган хонаси ва мутахассиси бўлган жойларда олиш мақсадга мувофиқ”, — деди у.
Аввалроқ Тошкентда 13 сентябрь куни “Дунё бўйлаб” телеканалининг 31 ёшли бошловчиси Рамина Ягафарова вафот этгани ва ўлимидан бир кун олдин левофлоксацин (антибиотик) дорисини истеъмол қилгани ҳақида хабар берилган эди.
Суд-тиббиёт экспертизаси маълумотларига кўра, журналистнинг ўлими “доридан аллергик реакция. Бош мия ўпка ўткир ишиши. Ўткир нафас юрак-қон томир етишмовчилиги. Анафилактик шок” туфайли юзага келган.
Мавзуга доир:
Изоҳ (0)