Тошкент шаҳрида 13 сентябрь куни вафот этган “Дунё бўйлаб” телеканалининг 31 ёшли бошловчиси Рамина Ягафарова ўлимидан бир кун аввал Левофлоксацин (антибиотик) дорисини истеъмол қилгани айтилмоқда.
“Дарё” мухбири йиғган маълумот кўра, Левофлоксацин (антибиотик) дориси Соғлиқни Сақлаш вазирлиги ҳузуридаги Фармацевтика маҳсулотлари хавфсизлиги маркази давлат муассасаси томонидан рўйхатдан ўтказилган.
Дори воситалари, тиббий буюмлар ва тиббиёт техникалари учун берилган мувофиқлик сертификатлари мониторингининг ягона ахборот тизимида Левофлоксацин (антибиотик) қидирувга берилганда дорининг ўнга яқин тури рўйхатга олинганини кўриш мумкин.
Қонунчиликка кўра, дори воситаларининг, тиббий буюмларнинг ва тиббий техниканинг тиббиёт амалиётида қўлланилишига, қоида тариқасида, улар давлат рўйхатидан ўтказилгандан кейин рухсат этилади.
Реестр берган маълумотларга кўра, Қозоғистон, Украина, Россия, Беларусь, Ҳиндистон, Туркия ишлаб чиқарувчилари томонидан ишлаб чиқарилган Левофлоксацин савдо номидаги дори воситаси давлат рўйхатидан ўтказилган бўлиб, ушбу дори воситалари сифатини тасдиқловчи мувофиқлик сертификатига эга.
Суд-тиббиёт экспертизаси доридан аллергик реакция деб баҳоламоқда
Бош прокуратура берган маълумотларига кўра, журналист томоғи оғригани сабабли ўзининг ёнида бўлган Левофлоксацин (антибиотик) дорисидан бир дона ичган, орадан 10-15 дақиқа ўтиб эса унда тутқаноқ кузатилган ва ҳушини йўқотган. У кейинроқ ҳушига келган, 13 сентябрь куни соат 16:00 ларда Ягафаровани такроран тутқаноғи тутиб, кўрсатилган тиббий муолажаларга қарамай соат 17:50 да биологик ўлим ҳолати қайд этилган.
Суд-тиббиёт экспертизаси маълумотларига кўра, журналистнинг ўлими доридан аллергик реакция. Бош мия ҳамда ўпка ўткир шиши, ўткир нафар олиш ва юрак-қон томир етишмовчилиги. Анафилактик шок, туфайли юзага келган.
Ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
Антибиотикларни қўллаш чоғида анафилактик ёки аллергик шок кузатилганда нима қилиш керак? Мутахассис тушунтириш берди.
Стационар шароитда антибиотикларни қўллаш чоғида кузатилиши мумкин бўлган хавфли реакциялар юз берганда беморга қандай ёрдам бериш кераклиги бўйича Фармакологик назорат бўлими етакчи мутахассиси Равшан Абдуллаев ўз фикларини билдирди.
Мутахассиснинг айтишича, мободо антибиотик дори воситаси қилинганидан кейин ножўя таъсир реакцияси ривожланса биринчи навбатда энг хафли анафилактик ёки аллергик шок кузатилиши мумкин.
“Анафилактик ёки аллергик шокни ўз вақтида, иложи борича тез фурсатда аниқлаш лозим. Кўпинча буни фақат ихтисослашган мутахассисгина қилиши мумкин.
Бунда мутахассис ножўя таъсирнинг шоклигини ва даражасини аниқлайди. Ундан кейин шунга мувофиқ ёрдам кўрсатади. Биринчи шокка қарши дори воситалари керак бўлади. Гоҳида улар ҳам етарли бўлмай қолганда шокдан чиқариш учун қўшимча ускуналар лозим бўлади. Масалан, кисларод маскаси. Тезда юрак муолажасини қилишга тўғри келади. Агар юрак тўхтаб қолиб, фибриллация юз берса дефибриллятор керак бўлади.
Юқорида мен санаб ўтган муолажалар фақатгина беморнинг ҳаётини сақлаб қолиш учунгина амалга ошириладиган ишлардир. Ундан кейин, яъни бемор шок ҳолатидан чиқарилганидан кейин тўлиқ стационар даволаниши лозим”, — деди Равшан Абдуллаев.
Мутахассис юқоридаги муолажаларни уй шароитида қилса бўладими деган саволга жавоб берди.
“Йўқ, уй шароитида қилиб бўлмайди. Шунинг учун бундай дори воситаларини фақат шифохонада – ихтисослаштирилган хонаси ва мутахассиси бўлган жойларда олиш мақсадга муовиқ”, — деди у.
Изоҳ (0)