Тошкент шаҳрининг Чилонзор туманидаги кўп қаватли уйлардан бири чўкиб, деворлари ёрилгани маълум бўлди. Бу ҳақда туман ҳокимлиги ахборот хизмати хабар тарқатди.
Таъкидланишича, ижтимоий тармоқларда Чилонзор туманидаги “Наққошлик” маҳалласида жойлашган 21-сонли кўп қаватли уйнинг яшаш учун яроқсиз ҳолга келиб қолгани ҳақида хабар тарқалган.
Туман ҳокимлигининг тегишли мутасаддилари томонидан кўрсатилган манзилда ўрганиш ўтказилди. Маълум бўлишича, кўрсатилган манзилдаги 4 қаватли ушбу бино 1970 йилда қурилган бўлиб, унда 4 та йўлак ва 71 та хонадон жойлашган. Мазкур бинонинг бир томонида чўкиш ҳолати бўлганлиги сабабли ҳақиқатдан бинонинг деворлари ёрилган, — дейилади ҳокимлик хабарида.
Қўшимча қилинишича, туман ҳокимлиги томонидан бинони техник жиҳатдан ўрганиш юзасидан “ЎзГАШКЛИTИ” институтига ҳамда Гидрология ва муҳандислик геологияси институтига хатлар жўнатилган.
Мазкур ташкилотлар томонидан тегишли хулосалар берилгандан сўнг ушбу муаммони бартараф этиш чоралари кўрилишини маълум қиламиз», — дейди ҳокимлик масъуллари.
Изоҳ (0)