Nasafnews нашри Қарши шаҳри «Шодлик» маҳалласида жойлашган 2-сонли ётоқхона хароб аҳволда экани, вилоят ва шаҳар ҳокимлиги ҳолатга эътибор қаратмаётгани ҳақида хабар берди. Вилоят ҳокимлиги ҳолатга муносабат билдирди.
Маълум қилинишича, мазкур бино 2019 йил 3 майдаги олди-сотди шартномасига асосан тадбиркор Анвар Жовлиев томонидан сотиб олинган. Яъни, бино ҳозирда ётоқхона эмас, қонуний тадбиркорнинг хусусий мулки ҳисобланади. Бинода жами 120 та хона мавжуд бўлиб, шундан 18 таси ёрдамчи хоналар (ошхона, ювиниш хонаси, омборхона), 102 таси яшашга мўлжалланган хоналардан иборат. Ўрганишлар жараёнида бугунги кунда 64 та хонада фуқаролар ноқонуний яшаб келаётгани, турли ҳудудлардан келиб, ўзбошимчалик билан ётоқхонага жойлашиб олгани, тадбиркор бир неча бор огоҳлантиришига қарамасдан, хоналардан чиқмагани аниқланган. Тадбиркор А. Жовлиев инсонийлик жиҳатидан уларнинг яшашига рухсат беришга мажбур бўлган.
Мавзуга доир: Қарши шаҳри марказидаги харобада яшаётган 69 та оила бор. Аҳоли карантин пайтида ушбу харобасидан ҳам мосуво бўлиши мумкин
Қайд этилишича, ҳозирда ётоқхона ва унинг атрофида тозалаш, ободонлаштириш ишлари олиб борилиб, тартибга келтирилган.
Таъкидланишича, бинодаги кўпчилик фуқароларнинг ўз яшаш ҳудудларида уй-жойлари мавжуд.
«Тез кунларда ким уй-жойга муҳтож, кимнинг уй-жойи борлиги ўрганилиб, ҳар бири бўйича охирги хулосалар берилади. Шунга қараб бинода яшаб келаётган уй-жойи бўлмаган фуқароларни келгусида турар жойлар билан таъминлаш чоралари кўрилади. Туманлардан келиб бинога жойлашиб олган фуқаролар аввалги яшаш манзилларига қайтарилади. Барча фуқаролар муаммоси тегишли тартибда ҳал этилганидан сўнг бино тадбиркорга бўшатиб берилади», — қайд этилади хабарда.
Изоҳ (0)