Toshkent shahrida 2022/2023-o‘quv yili davomida xalqaro va mintaqaviy fan olimpiadalarida g‘olib bo‘lgan o‘quvchilar va ularning ustozlarini taqdirlash marosimi bo‘lib o‘tdi, deya xabar berdi “Daryo” muxbiri.
Tadbir Maktabgacha va maktab taʼlimi vazirligi tomonidan tashkil etildi. Marosimda 65 nafar sovrindor va ularga taʼlim bergan o‘qituvchilarga bir martalik pul mukofotlari va qimmatbaho sovg‘alar topshirildi. Xususan, nufuzli xalqaro olimpiadalarda g‘oliblikni qo‘lgan kiritgan yoshlarga 165 million so‘mdan, o‘qituvchilariga esa 148 million 500 ming so‘mdan mablag‘lar topshirildi.
Marosimda nutq so‘zlagan maktabgacha va maktab taʼlimi vaziri Hilola Umarovaning aytishicha, o‘quvchilar bu yil avvalgi yillarga qaraganda eng ko‘p medallarni qo‘lga kiritdi.
“Joriy o‘quv yilida Yaponiya, BAA, Shveysariya, Vengriya davlatlarida bo‘lib o‘tgan nufuzli xalqaro olimpiadalarda 2 ta oltin, 1 ta kumush va 10 ta bronza medallari qo‘lga kiritilib, o‘quvchilarimiz tomonidan tarixiy g‘alabalarga erishildi. Bundan tashqari, yil davomida o‘quvchilarimiz turli mintaqaviy xalqaro olimpiadalarda ham ishtirok etib, 6 ta oltin, 23 ta kumush va 23 ta bronza medalga sazovor bo‘ldi. Bu natijalar o‘quvchi va ustozlar saʼy-harakatlari bilan amalga oshdi”, —dedi vazir.
Vazirlik boshqarma boshlig‘i Umid Rahmonov “Daryo” muxbiri bilan suhbatda sovrindorlarni taqdirlash uchun ajratiladigan mablag‘lar miqdori 4 yil ichida 10 baravar ortganini taʼkidladi.
“Bu yil o‘quvchilarimiz 65 ta medalni qo‘lga kiritishdi. Shundan 8 tasi oltin, 24 tasi kumush, 33 tasi bronza medallaridir. 2019-yilda g‘oliblarni rag‘batlantirish tizimi joriy qilinganda dastlabki ajratilgan mablag‘ miqdori 780 million so‘m bo‘lgandi. Bugun esa u ko‘rsatkich 8 milliard so‘mga yetdi, yaʼni 10 barobarga ko‘paydi. Bu maktab taʼlimiga berilayotgan eʼtibor natijasi”, — dedi u.
Marosimda Shveysariyada bo‘lib o‘tgan 55-kimyo olimpiadasida oltin medalni qo‘lgan kiritgan Azizbek Nazarovga 165 million so‘m pul mukofoti tantanali topshirildi. Uning aytishicha, olimpiadaga tayyorgarlik jarayoni ancha og‘ir kechgan.
.jpg)
“Olimpiadaga tayyorgarlik jarayonida bizga haftada har kuni dars bo‘lardi. Taʼtilga ham chiqmasdik. G‘alabaga erishish uchun kuniga 10 soatlab kitob o‘qidim. Mehnatlarim natijasini berganidan xursandman. Olimpiadaga o‘qituvchilarimiz bilan 2 yil tayyorlandik. Sinovlar nazariy va laboratoriya bosqichidan iborat bo‘ldi. Bizdan 4 kishi qatnashdik va hammamiz medal bilan qaytdik. Xalqaro olimpiadalargacha mintaqaviy olimpiadalarda ham g‘olib bo‘lganmiz. Bugun menga berilgan 165 million so‘m pul o‘zimga ko‘plik qiladi. Uning bir qismini o‘qishim uchun sarflamoqchiman. Qolganini otamga beraman va bu mening niyatlarimdan bittasi”, — dedi u.
Shuningdek, Azizbek Nazarov oliy taʼlimni O‘zbekistonda davom ettirmoqchi ekanini aytdi.
“O‘zim Qashqadaryolikman. Hozirda Toshkent shahridagi Ibn Sino nomidagi ixtisoslashtirilgan maktabning 11-sinf bitiruvchisiman. Kelgusida Toshkent tibbiyot akademiyasida o‘qimoqchiman”, — dedi olimpiada g‘olibi.
Bu yil Azizbekning ustozi, kimyo fani o‘qituvchisi Mohira Boltayevaning 7 nafar o‘quvchisi xalqaro hamda mintaqaviy olimpiadalarda g‘olib bo‘ldi. Uning aytishicha, insonda natijaga erishish uchun avvalo xohish bo‘lishi darkor.
“Bu yil nufuzli xalqaro olimpiadada ikki nafar, mintaqaviy Mendeleyev olimpiadasida 3 nafar o‘quvchim medal oldi. Bundan juda ham mamnunman. O‘zim ham 2019-yilda xalqaro olimpiadada ishtirok etib, kumush medal olganman. Albatta, olimpiada 10 kunda o‘tib ketadi. Lekin unda qatnashish uchun yillar davomida juda ham zich grafik asosida tayyorgarlik ko‘rganmiz. Bayramlar, dam olish kunlarida ham ishlaganmiz. Eng muhimi, insonda xohish bo‘lishi kerak. Olimpiada juda ham uzoq yo‘l. Xalqaro maydonni ko‘rgan inson hali ko‘p narsa bilmasligini anglab yetadi. Chunki boshqa yoshlarning bilim darajasini ko‘radi. Bundan yanada oldinga yurishga o‘rganadi”, — dedi muallim.
Tantanali tadbirda akademik Abdulla Aʼzam ham qatnashdi. Olim yoshlar va ustozlarga murojaat qilib, uchinchi renessansni qurish vaqti kelganini aytdi.
“Tariximizda ikkita ilm-fan yuksalishi bo‘lgan. Birinchi renessans Al-Xorazmiydan boshlanadi, to mo‘g‘ul istilosi va Beruniy, Ibn Sinolargacha. Ikkinchisi, temuriylar va Mirzo Ulug‘bek davrida. Farzandlarimiz tomirida ana shu buyuk ajdodlarimiz qoni oqmoqda. Va biz yana jahonga o‘zbekning intellektual salohiyati va qudratini ko‘rsatib qo‘yishimiz kerak. Ana shu uchinchi renessans bo‘ladi. Buning uchun hurmatli o‘quvchilar, men sizlardan iltimos qilaman, erishgan natijangiz bilan to‘xtab qolmang. Yuksak marralarni ko‘zlang. Matematik bo‘lsangiz, Filds medali olishni niyat qiling. Fizik, ximik, geolog bo‘lsangiz, Nobel mukofoti olishga harakat qiling. Qo‘rqmang. Bunga sizning iqtidor va salohiyatingiz yetadi. Faqat maqsaddan chalg‘imasangiz bo‘ldi. Hayotda chalg‘itadigan narsalar ko‘p”, — dedi olim.
Vazirlik bergan maʼlumotlarga ko‘ra, so‘nggi marotaba 5 ta xalqaro olimpiada joriy yil kabi to‘liq anʼanaviy shaklda 2019-yilda o‘tkazilgan va unda o‘quvchilar tomonidan 8 ta medal (2 ta kumush, 6 ta bronza) qo‘lga kiritilgan.
2021-yildagi natija bundan avvalgi eng yaxshi natija bo‘lgan, biroq u paytda pandemiya sababli barcha olimpiadalar onlayn shaklda o‘tkazilib, o‘quvchilar faqat nazariy savollarga javob bergan hamda amaliy va tajriba-sinov topshiriqlari berilmagan. O‘zbekistonlik o‘quvchilar 2022-yilda 6 ta medal, 2021-yilda 10 ta medal qo‘lga kiritgan.
Eslatib o‘tamiz, O‘zbekiston prezidentining 2019-yil 3-maydagi qaroriga muvofiq:
- oltin medalni qo‘lga kiritgan o‘quvchilar BHMning 500 baravari (165 million so‘m), ustozi 450 baravari (148,5 million so‘m);
- kumush medal uchun — o‘quvchi BHMning 300 baravar miqdori (99 million so‘m), ustozi 250 baravar (82,5 million so‘m);
- bronza medal uchun — BHMning 200 baravari (66 million so‘m), ustozi 150 baravar (49,5 million so‘m) pul mukofotlari bilan taqdirlanadi.
Bundan tashqari, Xalqaro olimpiada g‘oliblari OTMlarga imtiyoz bilan grant asosida o‘qishga qabul qilinib, keyinchalik taʼlim muassasalarida o‘qituvchi bo‘lib faoliyat yuritadigan taqdirda, lavozim maoshiga 150 foiz har oylik ustama oladi.
Izoh (0)