Қашқадарё вилоятининг Шаҳрисабз шаҳрида яшовчи 7 ойлик чақалоқ сирка кислотаси ичирилиши оқибатида оғир аҳволда шифохонага олиб келинди. Бу ҳақда вилоят соғлиқни сақлаш бошқармаси хабар берди.
Маълум бўлишича, чақалоқнинг ота-онаси ва яқинлари беморга кўрсатилаётган тиббий ёрдамдан норози бўлиб, ижтимоий тармоқлар орқали чиқиш қилган.
Шаҳрисабзлик 2023 йил 7 февралда туғилган бемор И.Х. Республика шошилинч тез тиббий ёрдам илмий маркази Қашқадарё филиали реанимация бўлимига 2023 йил 9 сентябрь куни соат 15:32 да оғир аҳволда олиб келинган. Ота-онасининг сўзларига кўра, шу куни соат 12:00 лар атрофида назоратсизлик ва эҳтиётсизлик оқибатида гўдакка сувда эритилмаган юқори концентрацияли цирка кислотаси ичирилган. Оқибатда аҳволи оғирлашган гўдак дастлаб Шаҳрисабз тумани тиббиёт бирлашмаси болалар шифохонасига келтирилган. Сўнг филиалга юборилган, — дейилади видеомурожаатга жавоб қилган бошқарма ахборотида.
Таъкидланишича, шифохонада беморга cирка кислотасидан ўткир заҳарланиш. Оғиз бўшлиғи, лаблари, ҳалқум, ҳиқилдоқ ва қизилўнгач шиллиқ қаватларининг 1–2-даражали кимёвий куйиши, токсик нефрит, токсик миокардит, токсик пневмония ташхиси қўйилиб, реанимация бўлимига ётқизилган ва стандарт бўйича интенсив даво муолажалари бажарилмоқда.
Касалликнинг иккинчи суткасида юқори нафас йўллари куйиши натижасида юқори нафас йўллари стенози ва шиши ривожланиб, беморда нафас етишмовчилиги учинчи даражаси ва юрак қон-томир етишмовчилиги натижасида тўсатдан юрак тўхташи кузатилди. Интенсив реанимацион чоралар кўрилганидан сўнг юрак уриши тикланди ва бемор сунъий нафас аппаратига ўтказилди. Беморда стандарт асосида тўлиқ реанимацион чора-тадбирлар давом эттирилмоқда, — дейилади масъуллар ахборотида.
Билдирилишича, тармоқларда тарқалган видеомурожаатда беморга тиббий хизмат кўрсатган шифокорлар шаънига “суперконтракт”да ўқиган қабилида айбловлар ёғдирилган.
Ваҳоланки, улар кўп йиллик тажрибага эга бўлган, олий тоифали врачлар ҳисобланади. Лор-шифокор санитар авиация йўналиши орқали олиб келинган, гўдакнинг аҳволи оғирлиги сабабли у тўғридан тўғри реанимация бўлимига келиб, формасиз бўлса ҳам, шошилинч ёрдам кўрсатишни лозим деб топган. Шундан сўнг токсиколог, реаниматолог, комбустиолог, болалар хирурги ва бошқа мутахассислар иштирокида консилиум ўтказилган. Республика шошилинч тиббий ёрдам илмий маркази мутахассисларидан телемедицина орқали тегишли тавсиялар олинмоқда. Ижтимоий тармоқларда видеомурожаат билан чиқаётган беморнинг яқинларидан вазият нечоғлик мураккаб бўлмасин, эҳтиросга берилмасдан, ҳолатни тўғри баҳолашлари ва қонун доирасида иш тутишлари сўралади, — дейди масъуллар.
Қўшимча қилинишича, 7 ойлик чақалоқ учун ушбу ҳолат ўта оғир ҳисобланади. Бола организми ҳали бундай жароҳатни кўтариши қийин. Бемор тана ҳароратининг кўтарилиши токсик пневмония билан боғлиқ. Ҳозирда вазият вилоят соғлиқни сақлаш бошқармаси назоратига олинган, гўдакнинг аҳволи касалликни кечиши, юзага келган асоратлар сабабли оғирлигича қолмоқда.
Изоҳ (0)