Бразилия президенти Луис Лула да Сильва Россия раҳбари Владимир Путин мамлакатга келган тақдирда уни ҳибсга олмаслик ҳақидаги кафолатларини бекор қилди.
11 сентябрь куни журналистлар билан суҳбатда Лула да Сильва Путиннинг Бразилияда ҳибсга олиниши ёки йўқлигини билмаслигини айтди. Унинг таъкидлашича, буни ҳукумат эмас, суд тизими ҳал қилади.
Бир кун олдин, Бразилия президенти россиялик ҳамкасби Владимир Путинни келаси йили Рио-де-Жанейрода бўлиб ўтадиган G20 йиғилишида иштирок этса, ҳибсга олмаслигини айтганди.
Сиёсатчи Деҳлидаги G20 йиғилиши чоғида берган интервьюсида тегишли фикрни илгари сурган. У Россия президенти 2024 йилги тадбирга таклиф қилинишини айтган.
Эслатиб ўтамиз, Халқаро жиноий суд 2023 йил март ойида Путинни уруш пайтида юзлаб болаларни Украинадан ноқонуний равишда депортация қилишда айблаб, ҳибсга олишга ордер берганди. Энди Халқаро жиноий суднинг Рим статутини ратификация қилган давлатлар Путин уларнинг ҳудудига қадам босса, ҳибсга олиши керак.
Изоҳ (1)
Жуда хайрон буламанда, гарб давлатлари минглаб одамларни Ирокда, Сурияда, Ливияда бомбардимон килиб улдиргани учун Гаага деган суд каерда эди?