FТ: Туркияда Россиядан қочиб келган дастурчилар туфайли кибержиноят даражаси ошди

Туркияда кибержиноятлар даражаси мигрант хакерлар — Россияда сафарбарлик бошланганидан кейин мамлакатни тарк этган дастурчилар оқими туфайли ошди, деб ёзмоқда Financial Times турк полициясидаги манбалар ва киберхавфсизлик бўйича экспертларга таяниб.

Нашр суҳбатдошларига кўра, мигрант хакерлар дастлаб майда онлайн фирибгарлик билан шуғулланган, маҳаллий хакерлар билан ҳамкорликда Европа бозорида ўғирланган маълумотларни сотиш ва даромадларни ювишга киришган.

Бироқ яқинда турк полицияси тергов очишга қарор қилди, чунки россиялик ва маҳаллий хакерлар бир-бирининг кучли томонларидан фойдаланадиган гуруҳлар туза бошлаган.

Хусусан, аноним қолишни истаган киберхавфсизлик бўйича мутахассиснинг нашрга айтишича, у россияликларнинг туркиялик хакерларни катта ҳажмдаги маълумотлар билан ишлашга ўргатадиган Telegram гуруҳига кириб кўрган. Чатдаги хакерлар Ғарбий Европадаги алоқалари орқали фойдали битимларга эришган.

Манбанинг таъкидлашича, бошқа шунга ўхшаш чатларда хакерлар ўғирланган криптовалютани турк лирасига айлантириш ва Туркия фуқаролигини олиш учун кўчмас мулк сотиб олиш йўлларини муҳокама қилган.

“Улар орасида таниқли хакерлар йўқ, лекин улар жуда фаол ишламоқда, жараёнларни автоматлаштиришни яхши ўрганиб олган — уларнинг маҳсулдорлиги тез суръатлар билан ўсиб боряпти”, — деб хулоса қилди нашр суҳбатдоши.

Газета манбаларига кўра, хакерлар Redline зарарли дастури ёрдамида маълумотларни тўплайди, бу дастур кўпчилик антивирусларни четлаб ўтади. Redline'нинг асосий хусусияти — cookie-файлларга ўрнашиб олиши.

Ўз навбатида, Auren Cyber ​​Israel компаниясидан ахборот хавфсизлиги бўйича мутахассис Ошер Ассор хакерлар сўнгги бир неча соат ичида тўпланган янги маълумотлар пакетларини махсус Telegram гуруҳларида мунтазам равишда жойлаштириб туришини таъкидлади, бу эса уларни янада қимматли қилади.

Россияда сафарбарлик 2022 йил сентябрь ойи охирида бошланган ва Россия расмийларининг баёнотларига кўра, ноябрь ойи бошида якунланган. Мобилизация пайтида кўплаб руслар мамлакатни тарк этди. Кетганлар сони ҳақида аниқ маълумотлар йўқ, аммо гап ўн ёки юз минглаб одамлар ҳақида кетаётгани тахмин қилинмоқда.