Марокашда зилзила оқибатида ҳалок бўлганлар сони 2 122 нафарга, жароҳатланганлар сони эса 2 421 нафарга етди. Бу ҳақда Al Jazeera телеканали Ички ишлар вазирлиги маълумотларига таяниб хабар берди.
.jpg)
Телеканал маълумотларига кўра, йўллардаги тўсиқлар туфайли қутқарувчилар энг кўп жабрланган ҳудудларга етиб боришга қийналмоқда. Зилзила қурбонлари тўққизта вилоят ва префектураларда қайд этилган.
Қатар расмийлари Марокашга еттита қидирув-қутқарув вертолёти, чодирлар, тиббий асбоб-ускуналар ва озиқ-овқат кўринишида ёрдам жўнатди. Халқаро Қизил Хоч қўмитаси ташкилотнинг Марокашдаги филиалини қўллаб-қувватлаш учун фавқулодда вазиятлар фондидан қарийб 1 миллион доллар ажратди. Мамлакат шунингдек, Испания, Буюк Британия ва Бирлашган Араб Амирликларидан ёрдам олади.
Марокашдаги зилзила
9 сентябрь куни кечқурун Марракеш ва кўплаб шаҳарларда 6,8 магнитудали зилзила содир бўлди. Олис тоғли ҳудудларда бутун қишлоқлар вайрон бўлгани хабар қилинган.
Зилзила эпицентри Бутунжаҳон мероси мақомига эга ва сайёҳлар орасида машҳур бўлган Марракеш шаҳридан 71 километр (44 миля) жануби-ғарбда жойлашган Юқори Aтлас тоғларида жойлашган. Аммо ер силкинишлари пойтахт Работда, тахминан, 350 километр узоқликда, шунингдек, Касабланка, Агадир ва Эс-Сувейрда ҳам сезилган.
Ўзбекистон президенти зилзила қурбонларига таъзия йўллади
Шавкат Мирзиёев Марокаш ҳудудида юз берган кучли зилзила оқибатида кўплаб одамлар қурбон бўлгани ва жиддий жароҳат олгани, катта талафотлар кўрилгани муносабати билан Марокаш подшоҳи Муҳаммад VI га таъзия йўллади.
Давлат раҳбари вафот этганларнинг оила аъзолари ва яқинларига ҳамдардлик билдирди, жабрланганлар тез фурсатда соғайиб кетишини тилади.
Изоҳ (0)