Августда ўтказилиши керак бўлган БРИКС саммити Жанубий Африка Республикасидан Хитойга кўчирилиши мумкин, чунки Пекин Гаагадаги Халқаро жиноий суд (ХЖС) юрисдикциясини тан олмайди. Бу ҳақда манбаларга таяниб, Reuters хабар берди. Унга кўра, Жанубий Африка расмийлари шу йўл билан ХЖСнинг Россия президенти Владимир Путинни ҳибсга олиш тўғрисидаги қарорини четлаб ўтмоқчи.
Жанубий Африка расмийлари президент Сирил Рамафосани саммитни Хитойга кўчиришга кўндирмоқчилиги ҳақида аввалроқ The Daily Telegraph ёзган эди. Газета манбалари бу ХЖС қарори билан боғлиқлигини айтган.
17 март куни ХЖС Владимир Путинни ҳибсга олишга ордер берди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Апрель ойида Жанубий Африка ҳукумати Путинни БРИКС саммитига таклиф қилди. Айни пайтда ЖАР ХЖСнинг юрисдикциясига бўйсунади ва суд ишида гумондор деб ҳисобланганларни ҳибсга олишга мажбур.
Жанубий Африка ҳукумати Россия билан маслаҳатлашишга ваъда берди. 12 май куни Владимир Путин Жанубий Африка президенти Сирил Рамафоса билан телефон орқали гаплашди. Улар БРИКС саммитига тайёргарликни муҳокама қилган. Sunday Times газетасининг ёзишича, ЖАР ҳукумати Путиндан БРИКС саммитига келмасликни, балки видеоалоқа орқали қатнашишни сўраган.
Изоҳ (0)