Шавкат Мирзиёев 8 сентябрь куни Бутунжаҳон этноспорт конфедерацияси раиси Нажмиддин Билол Эрдўғон бошчилигидаги делегацияни қабул қилди, деб хабар бермоқда Президент матбуот хизмати.
Маълум қилинишича, учрашув аввалида Билол Эрдўған Ўзбекистон етакчисига Туркия президенти Ражаб Тоййиб Эрдўғон саломи ва энг эзгу тилакларини етказди.
Суҳбат давомида миллий спорт турлари ва халқ ўйинларини янада ривожлантириш ва оммалаштириш масалалари юзасидан фикр алмашилди.
Илк бор Хива шаҳрида дунёнинг 60 дан ортиқ мамлакатидан қарийб икки минг нафар спортчи иштирокида ўтказилаётган Халқаро этноспорт фестивали қўллаб-қувватлангани ва юксак даражада ташкил этилгани учун самимий миннатдорлик билдирилди.
Суҳбатда қўшма “йўл харитаси” асосида таълим дастурларини ишлаб чиқиш, тажриба алмашиш, мутахассислар, мураббий ва ҳакамларни тайёрлаш, ёшларни этноспортга кенг жалб қилиш бўйича ҳамкорликни кенгайтириш масалалари кўриб чиқилди.
Изоҳ (0)