Ўзбекистонда 2023 йилнинг ўтган етти ойда 4 772 та ЙТҲ қайд этилган. Бу ҳақда ИИВ Жамоат хавфсизлиги департаменти Йўл ҳаракати хавфсизлиги хизмати маълумотларида келтирилган.
Йўл-транспорт ҳодисаларининг келиб чиқиш сабабларини таҳлил қилган Олий Мажлис Сенатининг Мудофаа ва хавфсизлик масалалари қўмитаси раиси Қутбитдин Бурхоновга кўра, ушбу ЙТҲлар оқибатида 1 115 киши ҳалок бўлган, 4 минг 564 нафари турли тан жароҳатлари олган.
ЙТҲларнинг 2 453 таси ёки 51,4 фоизи субъектив сабабларга кўра содир этилган, яъни ҳайдовчилар йўл ҳаракати қоидаларига эътибор бермаслиги оқибатида келиб чиққан.
“Йўл-транспорт ҳодисаларида ҳалок бўлганларнинг 1 078 нафари ёки 96,7 фоизи хавфсизлик камарини тақмаган. Соҳа мутахассисларининг фикрича, агар орқада ўтирган йўловчилар хавфсизлик камарини таққан бўлганида олдинги ўриндиқларда ўтирган йўловчиларнинг кўпчилиги автоҳалокатда омон қолиши мумкин эди. Уларнинг сўзларига кўра, агар орқадаги йўловчилар камар тақмаган бўлса, ЙТҲ вақтида олдинги ўриндиқда ўтирган йўловчининг ҳалок бўлиш эҳтимоли беш баробар ортади”, — дейди Қутбитдин Бурхонов.
Тошкентда етти ойда 675 та йўл-транспорт ҳодисаси қайд этилган. Ҳодиса оқибатида 71 киши ҳалок бўлган, 787 киши турли тан жароҳатлари олган. Бахтсиз ҳодисаларнинг энг кенг тарқалган сабаби тезликни ошириш бўлган — 199 та ҳолат. Ҳайдовчилар томонидан 90 та ҳолатда тақиқловчи светофор ишорасига эътибор бермаслик, маст ҳолатда ҳайдовчилар иштирокида 8 та ЙТҲ содир этилган.
“Хулоса қилиб айтганда, йўл ҳаракати қатнашчиларининг ҳуқуқий маданиятини оширишда нафақат ички ишлар органлари ходимлари, балки таълим тизими, фуқаролик жамияти институтлари ва жамоат ташкилотлари вакиллари муҳим рол ўйнаши зарурлигига эътибор қаратиш лозим”, — дейди Қутбитдин Бурхонов.
Изоҳ (0)