Қорақалпоғистон Республикаси Жўқорғи Кенгеси раиси Аманбай Ўринбаев Чимбой туманини ижтимоий-иқтисодий ривожлантириш, фуқароларга муносиб турмуш шароитини яратиш бўйича амалга оширилаётган ишлар ва бу йўналишда йўл қўйилган камчиликлар юзасидан мажлис ўтказди.
Маълум қилинишича, 2023 йил туман дастури доирасида 9117 янги иш ўрни яратиш белгиланган бўлсада, бу вазифа тўлиқ бажарилмаган, ёлғон маълумотлар ва ҳисобатга қўшиб ёзишлар аниқланган.
Чимбой туман солиқ инспекцияси бошлиғи томонидан ўзига бириктирилган вазифаларга маъсулиятсизлиги туфайли бюджет тушумларида кўплаб камчиликлар юзага келган.
Шунингдек, туманда бир қатор молиявий камчиликлар ҳам аниқланган, ичимлик сув, газ ва электр энергияси учун қарздорликларни ундириш тўғри йўлга қўйилмаган.
“Мажлисда туман иқтисодиёт ва молия бўлими бошлиғи, туман солиқ бўлими бошлиғи ва туман тиббиёт бирлашмаси бошлиғини эгаллаб турган лавозимидан озод қилиш бўйича топшириқ берилди”, — дейилади хабарда.
Эсатиб ўтамиз, 2 август куни вилоятда президент раислигида камбағалликни қисқартириш, аҳоли бандлигини таъминлаш ва тадбиркорликни қўллаб-қувватлаш орқали солиқ базасини кенгайтириш бўйича видеоселектор йиғилиши бўлиб ўтган эди. Унда давлат раҳбари Бекобод, Бўка, Қўшкўпир, Шаҳрихон, Қонликўл, Тахтакўпир, Чимбой, Мирзаобод, Боғот, Улуғнор, Хўжайли, Шуманай, Мирзачўл, Дўстлик, Тўрақўрғон туманлари ва Наманган шаҳар ҳокимларининг биринчи ўринбосарларини лавозимидан озод этганди.
Изоҳ (0)